Զախարովան մեկնաբանել է Փաշինյանի՝ Բաքվի հետ չհարձակման պակտ կնքելու առաջարկը

ՌԴ ԱԳՆ պաշտոնական ներկայացուցիչ Մարիա Զախարովան հունվարի 31-ին կայացած ճեպազրույցում մեկնաբանել է Բաքվին ուղղված Երևանի առաջարկը, ըստ որի,  խաղաղության պայմանագրի ստորագրման գործընթացի ձգձգման դեպքում ստորագրեն չհարձակման պակտ։

«Դուք հստակ ձևակերպել եք այս առաջարկը, որն անմիջապես Երևանից ուղարկվել է Բաքու։ Դա ուղղված էր ադրբեջանական կողմին, ուստի ինձ թվում է, որ ադրբեջանական կողմին պետք է հարցնել։

Եթե դուք խոսում եք մեր սկզբունքային դիրքորոշման մասին և հետաքրքրված եք մեր մոտեցումներով, ապա մենք վստահ ենք, որ Հարավային Կովկասում կայունության և երկարաժամկետ խաղաղության հաստատման գրավականը 2020-2022 թվականներին ամենաբարձր մակարդակով ընդունված եռակողմ համաձայնագրերի կիրառման արագ վերսկսումն է։

Այն Բաքվի և Երևանի հաշտեցման այլընտրանք չունեցող ճանապարհային քարտեզ է։ Այն, ի թիվս այլ բաների, ներառում է խաղաղության պայմանագրի մշակումը»,-ասաց Զախարովան: