Զինծառայությունից խուսափելու համար ԱԱԾ աշխատակիցները բռնել են Օշականցի Գևորիկի որդուն

Երեկ՝ հունվարի 31-ին, ՀՀ Ազգային անվտանգության ծառայության Արագածոտնի մարզային վարչությունում, ՀՀ ՆԳՆ Արագածոտնի մարզային վարչությունում և ոստիկանության Աշտարակի բաժնում միաժամանակ օպերատիվ տեղեկություններ են ստացվել Օշական գյուղի բնակիչ 21-ամյա Սարգիս Մելիքյանի գտնվելու վայրի մասին։

Shamshyan.com-ի փոխանցմամբ, կարճ ժամանակում իրավապահները Օշականում հայտնաբերում են Ս. Մելիքյանին, և բերման ենթարկում ոստիկանության Աշտարակի բաժին:

Վերջինիս նկատմամբ ՀՀ Վերաքննիչ քրեական դատարանը 2023 թվականի հունիսին որոշում է կայացրել՝ որպես խափանման միջոց կալանավորումը:

Նրա նկատմամբ քրեական վարույթ է նախաձեռնվել ՀՀ նախկին ՔրՕրի 327-րդ հոդվածի 2-րդ մասի 2-րդ կետի հատկանիշներով (զինվորական ծառայությունից խուսափել):  

Նա քրեական աշխարհում հայտնի օրենքով գող Օշականցի Գևորիկի որդին է:

Ըստ աղբյուրի, Ս. Մելիքյանը ոստիկանության Աշտարակի բաժնից տեղափոխվել է ԱՆ քրեակատարողական ծառայության «Արթիկ» ՔԿՀ։