ՀՀ գլխավոր դատախազությունը Մոսկվայում ադրբեջանցու ձերբակալության մասին պաշտոնական տեղեկություն չունի

Հայաստանի գլխավոր դատախազությունը Մոսկվայի «Դոմոդեդովո» օդանավակայանում ադրբեջանցի ֆիթնես մարզիչ Քամիլ Զեյնալլիի ձերբակալության հետ կապված պաշտոնական տեղեկություն չունի։  Գլխավոր դատախազությունից հայտնեցին Panorama.am-ին՝ պատասխանելով հարցին, արդյոք Հայաստանը միջազգային հետախուզում է հայտարարել ադրբեջանցի ֆիթնես մարզիչ Քյամիլ Զեյնալլիի նկատմամբ, ինչպես նա է հայտարարել։ 

Հիշեցնենք՝  Զեյնալլին Ինսթագրամոմ  տեսանյութ է հրապարակել, որտեղ պատմել է, որ Բաքու վերադառնալու ճանապարհին՝ Մոսկվայի «Դոմոդեդովո» օդանավակայանում, ոստիկաններն իրեն բերման են ենթարկել և տարել ոստիկանական բաժանմունք։

«Նրանք ասացին, որ Հայաստանն իմ նկատմամբ միջազգային հետախուզում է հայտարարել»,- ասել է ադրբեջանցին։

Ադրբեջանի ԱԳՆ-ից հայտնել են, որ  Քամիլ Զեյնալլի ձերբակալության հարցը Ռուսաստանում Ադրբեջանի դեսպանատան վերահսկողության տակ է։

Իսկ ՌԴ-ում Ադրբեջանի դեսպանատունը հայտնել է, որ  ՌԴ ազգային օրենսդրության շրջանակներում, ձեռնարկում է բոլոր իրավական և դիվանագիտական ​​ջանքերը՝ Մոսկվայում ձերբակալված Քամիլ Զեյնալլիի իրավունքները պաշտպանելու համար. «Ադրբեջանի դեսպանատունը Զեյնալլիին փաստաբան է տրամադրել։ Ներկայումս ձերբակալվածի մոտ են դիվանագիտական ​​ներկայացուցչության աշխատակիցները, մասնավորապես՝ հյուպատոսը»։