Բաքվից հարձակվել են ԵԽ-ի վրա Հայաստանի հետ կապերի ամրապնդման բանաձևի ընդունման պատճառով

Ադրբեջանի ԱԳՆ մամուլի քարտուղար Այխան Հաջիզադեն հարձակվել է Եվրախորհրդարանի վրա՝ կապված մարտի 13-ին Եվրախորհրդարանի կողմից ընդունված բանաձևի հետ, որում խորհրդարանականները գործադիր կառույցներին խորհուրդ են տվել ամրապնդել հարաբերությունները Եվրամիության և Հայաստանի միջև։

«Եվրախորհրդարանի 2024 թվականի մարտի 13-ի բանաձևը, լինելով անհիմն և կողմնակալ, նաև երկակի ստանդարտների վառ օրինակ է մեր երկրի նկատմամբ»,- նշել է Ադրբեջանի ԱԳՆ պաշտոնական ներկայացուցիչը։

Բաքուն Եվրախորհրդարանին առաջարկել է «Եվրոպայում լուծել ավելի լուրջ խնդիրներ ՝ ռասայական խտրականության, իսլամաֆոբիայի, այլատյացության, ծայրահեղականության և միգրանտների նկատմամբ անմարդկային վարքագծի»:

«Այնպիսի բանաձևերը, ինչպիսին ընդունվել է, ոչ մի կապ չունեն այն արժեքների հետ, որոնք նրանք հռչակում են, ինչպես նաև ամբողջությամբ զրոյացնում են Եվրախորհրդարանի՝ որպես ինստիտուտի դերը»,-հավելել է Հաջիզադեն։

Հիշեցնենք, որ Եվրախորհրդարանը (ԵԽ) բանաձև է ընդունել Հայաստանի հետ կապերի ամրապնդման մասին։ Խորհրդարանականները գործադիր կառույցներին խորհուրդ են տվել ամրապնդել հարաբերությունները Եվրամիության և Հայաստանի միջև։ Պատգամավորները նաև կոչ են արել ուսումնասիրել Հայաստանին ԵՄ անդամակցության թեկնածուի կարգավիճակ տրամադրելու առաջարկը։ Բանաձևի հեղինակները կարծում են, որ Եվրամիությունը պետք է պատրաստ լինի սահմանափակող միջոցներ կիրառել ինքնիշխանությանը սպառնացող երկրների դեմ։