Մոսկվայում բերման են ենթարկել դերասանուհի Զեփյուռ Բրուտյանի հորը. ԶԼՄ-ներ

Դերասանուհի Զեփյուռ Բրուտյանի հորը՝ Արշակին Մոսկվայում բերման են ենթարկել ընդհատակյա խաղատուն կազմակերպելու համար։ Այս մասին գրում է Shot Telegram ալիքը։

«Գազետա.ռու»-ի փոխանցմամբ, մարտի 20-ին իրավապահ մարմինների աշխատակիցներն այցելել են Մոսկվայի Ռյազան թաղամասի անօրինական խաղատուն։ Նրանք բազմահարկ շենքի բնակարաններից մեկում հայտնաբերել են ութ խաղային ավտոմատ։

Ապօրինի բիզնես կազմակերպելու համար բերման են ենթարկվել երեք տղամարդ՝ 57-ամյա Արշակ Բրուտյանը և նրա հանցակիցները՝ գործազուրկ 26-ամյա Իլգամ Կ.-ն և 55-ամյա Արտաշես Թ.-ն։

Կասկածյալները մեղադրվում են «Ապօրինի շահումով խաղերի կազմակերպում, որը կատարվել է մի խումբ անձանց կողմից նախնական պայմանավորվածությամբ՝ առանձնապես խոշոր չափերով գումար կորզելու նպատակով» հոդվածով։

Այս դեպքում առավելագույն պատիժը վեց տարվա ազատազրկումն է։ Քրեական գործ դեռ չի հարուցվել, ոստիկանությունը փաստի առթիվ հետաքննություն է անցկացնում։

Զեփյուռ Բրուտյանը հայտնի դերասան Պավել Պրիլուչնիի երկրորդ կինն է։ Զույգը մեծացնում է իրենց որդուն՝ Միքայելին, ով մի քանի ամսից կդառնա մեկ տարեկան։