Օրենբուրգի շրջանի հեղեղված շրջաններից տարհանվել է ավելի քան 13 հազար մարդ

ՌԴ Օրենբուրգի շրջանի հեղեղված տարածքներից տարհանվել է ավելի քան 13 հազար մարդ։ Այս մասին հայտնում է երկրամասի կառավարությունը Telegram-ի իր ալիքում։

«Հեղեղված տնային տնտեսություններից և անձնական հողամասերից ընդհանուր առմամբ տարհանվել է 13 194 մարդ, որից 1145 մարդ, այդ թվում՝ 212 երեխա, տեղավորվել են 38 ժամանակավոր կացարաններում»,- ասվում է հրապարակման մեջ։

Վերջին տվյալներով, մարզում ջրի տակ է հայտնվել 12 213 տուն և 17 203 կենցաղային հողատարածք։

Շաբաթ առավոտյան Օրսկի հատվածում Ուրալ գետի ջրի մակարդակը կազմում է 731 սանտիմետր, կրիտիկական մակարդակը՝ 700 սանտիմետր։

Ռիա նովոստին հիշեցնում է, որ Հարավային Ուրալի շրջաններն այս տարի աննախադեպ ջրհեղեղների են բախվել։ Ամենաբարդ իրավիճակը Օրենբուրգի մարզում է։ Ապրիլի 5-ին ճեղքվել է ամբարտակը, որը պաշտպանում էր Օրսկը Ուրալ գետից։ Իշխանությունները զանգվածային տարհանումներ են իրականացրել։