Իրանը սպառնում է հարվածել Իսրայելի միջուկային օբյեկտներին, եթե վերջինս հարվածի իր համապատասխան օբյեկտներին

Իր միջուկային օբյեկտների վրա Իսրայելի հարձակման դեպքում Իրանը պատրաստ է հայելային պատասխան տալ։ Այդ մասին հայտարարել է Իրանի միջուկային օբյեկտների անվտանգության ապահովման համար Իսլամական հեղափոխության պահապանների կորպուսի ստորաբաժանումների հրամանատար Ահմադ Հաքթալաբը, որին մեջբերում է Tasnim գործակալությունը։

«Եթե Իսրայելը ցանկանում է գործողություններ ձեռնարկել մեր միջուկային օբյեկտների դեմ, նա անպայման կբախվի մեր պատասխանին։ Իսրայելը և նրա միջուկային օբյեկտները հարձակման կենթարկվեն: Իսրայելի միջուկային օբյեկտները բացահայտված են, բոլոր թիրախների մասին անհրաժեշտ տեղեկատվությունը մեր տրամադրության տակ է, և նրանց հնարավոր ագրեսիվ գործողություններին պատասխանելու համար մեր ձեռքերն արդեն դրած են հայտնաբերված թիրախները ոչնչացնելու հզոր հրթիռներ արձակելու ձգանի վրա»,- ասել է բարձրաստիճան զինվորականը։

Հաքթալաբը զգուշացրել է, որ Իսրայելի հարձակումից հետո Թեհրանը կարող է վերանայել իր միջուկային դոկտրինան։