Գյումրիից մեկնարկել է երթ դեպի Աբովյան՝ միանալու Բագրատ Սրբազանի առաջնորդած քայլերթին

Այսօր ՀԱԵ Տավուշի թեմի առաջնորդ Բագրատ արքեպիսկոպոս Գալստանյանի գլխավորած երթը կմեկնարկի ժամը 13:00-ից Չարենցավանի Վերածնունդի Հրապարակից։ Ուղղությունը Աբովյան։

«Շիրակը հանուն հայրենիքի» շարժման անդամներն արդեն սկսել են իրենց երթը դեպի Աբովյան քաղաք` միանալու Տավուշից սկիզբ առած երթին։ Երթը մեկնարկել է Յոթ Վերք եկեղեցու դիմացից։

«Միանում ենք ճշմարտության երթին։ «Շիրակը հանուն հայրենիքի» շարժումը նույն տրամաբանությամբ է ձևավորվել, երթով միանալու ենք Բագրատ Սրբազանի  գլխավորած ընդդեմ կեղծիքի, ընդդեմ ստի քայլերթին։ 

Անընդհատ պետք է մեր հայրենիքի կտրոները զոհաբերենք մեր թշնամիների՞ն։ Սա՞ է մեր տրամաբանությունը։ Այդ կեղծ սահմանազատման գործընթացն իրականացվում է մեր ինքիշխանության, մեր սուվերենության հաշվին»,- Գյումրիում քայլերթից առաջ ասաց քայլերից մասնակիցներից մեկը։ 

Հիշեցնենք, որ «Տավուշը հանուն հայրենիքի» շարժման անդամները Բագրատ Սրբազանի առաջնորդությամբ մայիսի 4-ին կեսօրից Կիրանցից քայլերթով սկսել են շարժվել Երևան։ Նրանք Երևան կհասնեն մայիսի 9-ին։

«Միակողմանի զիջումների այս աղետալի ընթացքը վերջ ու սահման չունի. հյուսիսից հարավ մենք մեծ, անհասկանալի արյունահոսության գործընթացում ենք գտնվում։ Այս գործընթացը պետք է դադարեցվի»,- քայլերթից առաջ հայտարարել էր Բագրատ Սրբազանը։

Քայլերթին բացի տավուշցիներից, միացել են Հայաստանի այլ շրջաններից քաղաքացիներ, արվեստագետներ, զոհված զինծառայողների հարազատները։ Քայլերթի մասնակիցները շարքերն անընդհատ համալրում են նոր քաղաքացիներ։