Իսպանիան եզրափակիչում է. Կխաղա այսօրվա հաղթողի հետ

Եվրո 2024 առաջնության կիսաեզրափակիչ փուլում Ֆրանսիա-Իսպանիա հանդիպումն ավարտվեց 1։2 հաշվով։

«Ես ոգևորված եմ, որ  եզրափակչում ենք, բայց մենք դեռ չենք արել ամենակարևորը, դա հաղթանակն է»,-հետխաղյան ասուլիսում հայտարարել է Իսպանիայի հավաքականի 16-ամյա խաղացող Լամին Յամալը, որը ճանաչվել է հանդիպման լավագույն խաղացող։

«Ես երախտապարտ եմ, որ կարողացա խաղադաշտում գլխավորել 26 հանճարների»,-ասել է Իսպանիայի հավաքականի մարզիչն ու ընդգծել, որ իրենց աշխատանքում ու հաղթանակի հասնելու ճանապարհին մարզիկներն անհագ են։

Իսպանիայի հավաքականը  հուլիսի 14-ին եզրափակիչում կխաղա այսօրվա հանդիպման՝ Նիդերլանդներ-Անգլիա հաղթողի հետ։

Հինգ տարվա ընթացքում  երկրորդ անգամ այս երկու եվրոպական ծանրքաշայինները հանդիպում են կիսաեզրափակիչում. 2019-ին Ազգերի լիգայի խաղում լրացուցիչ ժամանակից հետո  Նիդեռլանդները  հաղթեց 3:1 հաշվով: 

Այս թիմերի միջև անցկացված վերջին ութ խաղերից հինգը 90 րոպե անց ավարտվել է հավասար հաշվով։