Գորիսի համայնքապետ Առուշ Առուշանյանին 5 տարով կզրկեն պետական պաշտոններ զբաղեցնելու իրավունքից

Հակակոռուպցիոն վերաքննիչ դատարանը որոշում է ընդունել կասեցնել Գորիսի համայնքապետ Առուշ Առուշանյանի լիազորությունները և զրկել նրան պետական պաշտոններ զբաղեցնելու իրավունքից հինգ տարի ժամկետով։

Արդարադատության նախարարության խոսնակ Նորայր Շողիկյանը Panorama.am-ին ասաց, որ Գորիսի համայնքապետ Առուշ Առուշանյանը հրավիրվել է ՀՀ ԱՆ Պրոբացիայի ծառայության գրասենյակ, ներկայացել է հաշվառման։ Նրան տրվել է  դատական երեք ակտ, ըստ որի՝  նա տուգանվել է 700 հազար դրամով, պետք է անցնի 1,6 տարի փորձաշրջան, 5 տարի չի կարող զբաղեցնել պետական պաշտոններ։

24News-ը գրում է, որ քրեական գործը, որի շրջանակներում մեղավոր է ճանաչվել Առուշանյանը, վերաբերվում է «պաշտոնեական դիրքը չարաշահելուն, ինքնիրավչությանը, ինչպես նաև դիտավորությամբ այլ մարդու առողջությանը վնաս պատճառելուն»։

Այս թեմայի շուրջ 24News-ը փորձել է զրուցել Առուշանյանի հետ, սակայն նա չի պատասխանել հեռախոսազանգերին։