Նարեկ Հախնազարյան. Ստեղծել ենք «Արցախ» կամերային նվագախումբ, կփորձենք Արցախի անունը բարձր պահել

«Ես որպես արվեստագետ, աշխարհի բազմաթիվ բեմերից, որտեղ նվագել եմ, բարձրաձայնել եմ Արցախում տեղի ունեցող ողբերգական իրադարձությունների մասին»,- Panorama.am-ի հետ զրույցում ասաց աշխարհահռչակ թավջութակահար, ՀՀ վաստակավոր արտիստ Նարեկ Հախնազարյանը։

Նա ցավով արձանագրեց, որ այդ ամենը չօգնեց, քանի որ միայն այդպես հնարավոր չէ ինչ-որ բան փոխել։

«2020 թվականից բարձրաձայնում եմ Արցախի մասին, համերգներիս հատուկ ստեղծագործություններ նվիրում Արցախին։ Այդպես փորձում եմ մարդկանց տեղեկացնել, թե ինչ է կատարվում Արցախում, քանի որ աշխարհի  մեդիան չլուսաբանեց մեր ողբերգական իրադարձությունները»,- ասաց երաժիշտը։

Արվեստագետը համոզված է, որ արվեստը կարող է շատ բան փոխել, բայց ոչ միայնակ. «Արվեստը ուժեղ, հզոր գործիք է, բայց արվեստը չի կարող պատերազմներ հաղթել»։

Նարեկ Հախնազարյանը տեղկացրեց, որ հուլիսին ստեղծվել է «Արցախ» կամերային նվագախումբը, կազմված է Արցախից տեղահանված երաժիշտներից։ Նվագախմբի գլխավոր դիրիժորը, գեղարվեստական ղեկավարը հենց Նարեկ Հախնազարյանն է։

«Կփորձենք զարգանալ, Արցախի պատմությունն ու անունը բարձր պահել»,- ասաց նա։

Մանրամասն՝ տեսանյութում։