Սա կլինի սրբավայր արցախցիների համար. Եռաբլուրում կայացավ «Արցախի կանչը» հուշակոթողի հիմնարկեքը

Երևանի «Եռաբլուր» զինվորական պանթեոնում տեղի ունեցավ «Արցախի կանչը» հուշակոթողի հիմքի օծման՝ հիմնարկեքի արարողությունը:

Հուշակոթողը կամփոփի Արցախյան բոլոր նահատակների, Արցախում բոլոր հուղարկավորվածների և սեպտեմբերի 25-ին Պաշտպանության բանակի վառելիքի պահեստի ողբերգական պայթյունի հետևանքով զոհվածների հիշատակը:

«Արցախի կանչը» հուշակոթողի ճարտարապետ Միքայել Սարգսյանն ասաց, հուշակոթողի տարածքը 500 քմ է,  բուն կոթողը լինելու է 6 մետր բարձրության։ Նրա ներկայացմամբ, կոթողը պարզ, մինիմալիստական ոճով է. «Ի սկզբանե որոշել էիք այդպես, որպեսզի մեր ժողովրդի պարզությունն արտացոլենք նաև ճարտարապետության մեջ»։

«Սա կլինի սրբավայր արցախցիների համար»,- նշեց ճարտարապետը։

«Արցախի կանչը» հուշակոթողը կառուցվելու է արցախցիներից մեկի ֆինանսական աջակցությամբ, ում անունը նրա ցանկությամբ չի հնչեցվում։ 

Շինարարությունը կհամակարգի Արցախի Հանրապետության ներքին գործերի նախարար Կարեն Սարգսյանը։ Հուշակոթողի նախագծումն իրականացրել են արցախցի ճարտարապետներ հայր և որդի Վլադիմիր ու Միքայել Սարգսյանները։ 

«Արցախի կանչը» հուշակոթողը հնարավորինս մոտ է լինելու  Ստեփանակերտի եղբայրական հուշահամալիրին։