Վրաստանի մի քանի ընտրատեղամասերում վերահաշարկ կիրականացվի

Հարևան Վրաստանում անցած շաբաթ օրը՝ հոկտեմբերի 26-ին կայացած խորհրդարանական ընտրությունների արդյունքներն այսօր  կրկին կստուգվեն Վրաստանի բոլոր շրջանների մի շարք ընտրատեղամասերում։ Նման հայտարարություն է տարածել այդ երկրի Կենտրոնական ընտրական հանձնաժողովը։

«Սպուտնիկ Գրուզիա»-ի փոխանցմամբ, տեղամասային ընտրական հանձնաժողովների պաշտոնյաները վերահաշվարկ են իրականացնելու յուրաքանչյուր շրջանի հինգ ընտրատեղամասում։  Դրանք որոշվել են պատահականության սկզբունքով` վիճակահանությամբ:

«Ընտրատարածքային ընտրական հանձնաժողովները ձայների հաշվարկը կսկսվի հոկտեմբերի 29-ին՝ ժամը 12:00-ին, իսկ Թբիլիսիում՝ 17:00-ին: Թափանցիկություն ապահովելու համար համապատասխան մարմինները կարող են վերահսկել քվեաթերթիկների հաշվարկը»,-ասված է հանձնաժողովի հայտարարության  մեջ։

Հիշեցնենք, որ քվեարկության արդյունքում իշխող «Վրացական երազանք» կուսակցությունը ստացել է 53.93 տոկոս ձայն։ այս արդյունքները չեն ընդունում բոլոր չորս ընդդիմադիր ուժերը, որոնք անցել են խորհրդարան։ Նրանց աջակցող ՀԿ-ներն ու երկրի նախագահ Սալոմե Զուրաբաշվիլին հայտարարել են կեղծիքների մասին։