Թբիլիսիում կարմիր ներկ են լցրել Չեխոսլովակիայում 1989 թվականի թավշյա հեղափոխությանը նվիրված պաստառների վրա

Թբիլիսիում անհայտ անձինք կարմիր ներկ են լցրել Չեխոսլովակիայում 1989 թվականի թավշյա հեղափոխության 35-ամյակին նվիրված պաստառների վրա։

«Ցավոք սրտի, Չեխիայի թավշյա հեղափոխության 35-ամյակին նվիրված մեր ցուցահանդեսը մեկ շաբաթ անց ավարտվեց այս կերպ»,-սոցցանցերում գրել է Վրաստանում Չեխիայի դեսպան Պետր Կուբերնատը։

Ցուցահանդեսը կազմակերպել էր դեսպանությունը Թբիլիսիի Վացլավ Հավելի անվան այգու ցանկապատի վրա։

Վրաստանում Դանիայի դեսպան Անն Թոֆթ Սորենսենն արձագանքել է վանդալիզմի արարքին։

«Թբիլիսիում Դանիայի դեսպանատունը համերաշխություն է հայտնում Վրաստանում մեր չեխ գործընկերներին։ Նման գործողությունները խարխլում են մշակութային երկխոսության նկատմամբ հարգանքի հիմնական արժեքները»,-գրել է դեսպանը։

Վրաստանի ՆԳՆ-ն և Արտաքին գործերի նախարարությունը չեն մեկնաբանել միջադեպը։