Ավելի հավանական է, որ Հայաստանն անդամակցի Անդրոմեդայի համաստեղությանը, քան ԵՄ անդամ դառնա. Աշոտյան

«Քանիցս ասել եմ, որ ավելի հավանական է, որ Հայաստանն անդամակցի Անդրոմեդայի համաստեղությանը, քան Եվրամիության անդամ դառնա»,- այս մասին դատական նիստից հետո լրագրողների հետ զրույցում ասաց ՀՀԿ փոխնախագահ Արմեն Աշոտյանը՝ անդրադառնալով հարցին, թե ի՞նչ կարծիք ունի «Եվրաքվեի» նախաձեռնության վերաբերյալ:

«Կարծում եմ՝ ժամանակն է, որ ԵՄ իրական բարեկամները հայ ժողովրդին ուղիղ ասեն ճիշտը: Հայաստանը, ցավոք կամ բարեբախտասբար, կապ չունի, երբեք չի լինելու ԵՄ կազմում և սա աշխարհաքաղաքական գլոբալ ճշմարտություն է:

Եթե Բրյուսելում, Փարիզում, Բեռլինում պահպանվել են հայ ժողովրդի բարեկամներ, իրենք պարտավոր են ասել՝ ժողովուրդ ջան, շատ ուրախ ենք, որ դուք մեզ սիրում եք, բայց մենք ձեզ հետ երբեք չենք պսակվելու»,- ասաց նա:

Անդրադառնալով ՌԴ-ի արձագանքին՝ արդյո՞ք դուրս կգա Հայաստանը ԵԱՏՄ-ից, նա ասաց. «Սերժ Սարգսյանի բանակցային ժառանգությունը Նիկոլը մսխեց Արցախի հարցով, հիմա էլ մսխում է Սերժ Սարգսյանի գեոպոլիտիկ ժառանգությունը, մասնավորապես, ԵՄ-ի և ԵԱՏՄ-ի միջև հարաբերությունների ճիշտ դրված բալանսը, մսխում է Սերժ Սարգսյանի տնտեսական ժառանգությունը։

Միայն 2013 թվականին կնքված գազային պայմանագիրը Հայաստանին այս  տարիների ընթացքում առնվազն 8 միլիարդ դոլարի օգուտ է տվել։ Այն կնքվել էր Սերժ Սարգսյանի կողմից, ժամանակին քննադատվեց, իսկ այսօր մեծ օգուտներ է բերել։ Էլ չասեմ, թե ԵԱՏՄ-ի շնորհիվ ինչքան միլիարդների դոլարներ ենք ստանում՝ ֆիզիկական անձանց մակարդակից մինչև պետբյուջեի»: