Իրանի դեսպանատան գործերի ժամանակավոր հավատարմատարը կանչվել է Ադրբեջանի ԱԳՆ

Բաքվում Իրանի Իսլամական Հանրապետության դեսպանության գործերի ժամանակավոր հավատարմատար Սեյյեդ Ջաֆար Աղայի Մարիանին կանչել են Ադրբեջանի արտաքին գործերի նախարարություն։ Այս մասին հայտնում է Ինտեֆաքսը։

«Հանդիպմանը նրան բողոք է ներկայացվել իրանական լրատվամիջոցներում, կառավարական շրջանակներին մոտ կանգնած, ինչպես նաև Ադրբեջանի ղեկավարության դեմ բացահայտորեն իրականացվող հակաադրբեջանական արշավի առնչությամբ», - հաղորդում է Ադրբեջանի ԱԳՆ-ն։

Ադրբեջանական կողմը հայտարարել է, որ նման քայլերը վնասում են երկկողմ հարաբերություններին և պետք է անհապաղ դադարեցվեն։

Իրանցի դիվանագետը վստահեցրել է, որ այս տեղեկատվությունը կհասցնի Իրանի իրավասու մարմիններին։