Որոշել եմ մասնակցել Գյումրու ընտրություններին՝ հավակնելով քաղաքապետի պաշտոնին. գործարար Կարեն Սիմոնյան

Գյումրեցի գործարար Կարեն Սիմոնյանը հայտնում է, որ մասնակցելու է Գյումրու ավագանու արտահերթ ընտրութուններին՝ հավակնելով քաղաքապետի պաշտոնին:

«Խորհրդակցելով ընկերներիս, թիմակիցներիս, բազմաթիվ գյումրեցիներ հետ՝ որոշել եմ մասնակցել Գյումրու ավագանու արտահերթ ընտրութուններին՝ հավակնելով քաղաքապետի պաշտոնին:

Այս որոշումս ամրապնդվեց Գյումրին ազատ տնտեսական գոտու  ծրագրի ստորագրահավաքի ընթացքում, որտեղ 7500 գյումրեցիներ աջակցություն են հայտնել այդ ծրագրին»,- տեսաուղերձում նշում է Կ. Սիմոնյանը։ 

Նա հայտնում է, որ ինքը մասնակցում է ընտրություններին «Մայր Հայաստան» շարժումով։

«Մենք հաղթանակի ակնկալիքով ենք մասնակցում։

Մեր նվազագույն  ծրագիրը Գյումրիում «Քաղաքացիական պայմանագրի» իշխանազրկումն է։ Այս առումով առաջիկայում կներկայացնենք ընտրություններին մասնակցելու մեր սկզբունքները»,- նշում է Կ.Սիմոնյանը։ 

Հիշեցնենք, որ Գյումրիում ավագանու արտահերթ ընտրությունները նշանակված են մարտի 30-ին։
Կուսակցությունների, կուսակցությունների դաշինքների ընտրական ցուցակների առաջադրման և գրանցման համար անհրաժեշտ փաստաթղթերը թիվ 31 ընտրատարածքային ընտրական հանձնաժողով կարող են ներկայացնել մինչև մարտի 5-ը, ժամը 18:00-ն: Գրանցումն իրականացվելու է մարտի 5-ից մինչև մարտի 10-ը՝ ժամը 18:00-ն:

Նախընտրական քարոզչության ժամանակահատվածն է մարտի 15-ից  մինչև մարտի 28-ը՝ ժամը 24:00-ն։