Մանե Թանդիլյան. Այս իշխանությունը գերիների, պատանդների թեման մոռացության մատնելու հակում ունի

«Ապրելու երկիր» կուսակցության համահիմնադիրներ Մանե Թանդիլյանը, Մեսրոպ Առաքելյանն ու այլ քաղաքացիներ կառավարության շենքի դիմաց են՝ Բաքվի բանտերում պահվող գերիների, պատանդների վերադարձի պահանջով։

Այս պահին շենքի ներսում ընթանում է գործադիրի նիստը։

Ինչպես լրագրողների հետ զրույցում ասաց Թանդիլյանը՝ կառավարության հետ հանդիպում իրենք չեն պահանջում։

«Այս իշխանությունը շարունակում է ամբարտավան պահվածքը՝ ասելով, թե ինչ պետք է անեն Հայաստանի կառավարությունը, որ չի անում։ Մենք բոլորս գիտենք, որ ոչինչ չեն ձեռնարկում, բայց այսօրվա ակցիայով ցանկանում ենք հիշեցնել, ինչ պետք է արվի, որ չի արվում։ Էլ չենք ասում, թե ինչեր են անում, որ խանգարում է գերիներին»,-ասաց գործիչը։

Նա ընդգծեց՝ այս իշխանությունը թեման մոռացության մատնելու հակում ունի, իսկ իրենք փորձելու են տարբեր միջոցներով, միջոցառումներով թեման պահել օրակարգում։

«Մենք պետք է ցույց տանք նաև աշխարհին, որ չծաղրեն Հայաստանի Հանրապետությանն ու ՀՀ քաղաքացիներին»,-ասաց Թանդիլյանը։