Ամբողջ աշխարհում պարենային ապրանքների գները բարձրացել են

Պարենի համաշխարհային գների համախառն ցուցանիշը մարտի համեմատ աճել է 1%-ով։ Այս մասին հայտնում է ՄԱԿ-ի Պարենի և գյուղատնտեսության կազմակերպությունը (FAO):

«FAO-ի պարենային ապրանքների գների ինդեքսը (FFPI) 2025 թվականի ապրիլին միջինը կազմել է 128,3 կետ՝ 1,2 կետով (1%) գերազանցելով մարտի մակարդակը։ Շաքարավազի և բուսական յուղերի գների անկումը չի փոխհատուցել հացահատիկի, կաթնամթերքի և մսի գնաճը։

Կազմակերպությունը հայտնել է, որ հացահատիկի գների ինդեքսը ապրիլին կազմել է 111 կետ։ Սա 1,3 կետով (1,2%) գերազանցում է մարտի ցուցանիշը։ Կաթնամթերքի գների ինդեքսն աճել է 3,5 կետով (2,4%)՝ հասնելով 152,1-ի։

Զգալիորեն բարձրացել են նաեւ մսի գները։ Ապրիլին ցուցանիշն աճել է 3,7 կետով (3,2%)՝ հասնելով 121,6-ի։ «Գազետա ռու»-ն գրում է, որ միջազգային գները բարձրացել են բոլոր կատեգորիաներում, խոզի միսը ցույց է տվել ամենազգալի աճը:

Միաժամանակ շաքարավազի գների ինդեքսը մարտի համեմատ նվազել է 4,1 կետով (3,5%)՝ հասնելով 112,8-ի։ Այս իրավիճակը կապված է համաշխարհային տնտեսության անորոշ հեռանկարների և սննդի արդյունաբերության պահանջարկի վրա դրա հնարավոր ազդեցության հետ կապված մտահոգությունների հետ:

Ապրիլին նույնպես նվազել է բուսական յուղերի գների ինդեքսը (3,7 կետով կամ 2,3%-ով)։ Այն կազմել է 158 միավոր։ Հիմնական պատճառը, ըստ FAO-ի, արմավենու յուղի գների անկումն է՝ պայմանավորված մատակարարումների ավելացմամբ։