Մշակույթի զարգացման հիմնադրամը՝ թանգարանների կողքին

Անցած տարվանից գործող Մշակույթի զարգացման հիմնադրամը, որի հիմնական նպատակն է ժամանակակից միջոցների կիրառմամբ նպաստել մշակույթի զարգացմանը, հանրահռչակմանը, նպաստել մշակութային քաղաքականության արդյունավետ իրագործմանը, այս պահին արդեն համագործակցում է հայաստանյան 20 թանգարանների հետ, հետագայում այս ցանկն ավելանալու է։ Հիմնադրամի մեկ տարվա գործունեությունը ներկայացնելով՝ ասաց հիմնադրամի PR պատասխանատու Ռոզա Գրիգորյանը։

Տարվա ընթացքում հիմնադրամի իրականացրած նախագծերից է  Հայաստանի պատմության թանգարանում բացված «Մայր աստվածություն. Անահիտից Մարիամ» աննախադեպ միջազգային ցուցահանդեսը, որի շրջանակում ներկայացվել է Բրիտանական թանգարանից հատուկ այս ցուցադրության համար Հայաստան բերված Անահիտ դիցուհու հայտնի բրոնզե արձանի գլուխը և ձեռքը։ Ռ.Գրիգորյանի ներկայացմամբ, այս ցուցահանդեսն ունեցել է Հայաստանի անկախ պատմության մեջ աննախադեպ քանակի այցելու՝ ավելի քան 55 հազար. «Հասարակության իրազեկման համար հիմնադրամի կողմից իրականացվել է համալիր PR արշավ՝ թվային ու ֆիզիկական ամենատարբեր միջոցներով»։

Հաջորդ նախագծերից է Թանգարանային գիշեր միջոցառումը։

«Միջոցառման հանրահռչակման համար հիմնադրամն իրականացրել է  սոցիալական, մեդիա արշավներ։  Մեր կատարած աշխատանքի արդյունքում նույնպես գրանցել  է աննախադեպ արդյունք՝ 100 հազարով ավելի այցելու նախորդ տարվա համեմատ»,- ասաց նա։

Հիմնադրամի իրականացրած նախագծերից է «Տարեհաց» խորագրով Ամանորի ուտեստի տոնավաճառը, Շպիտելբերգի Սուրբ Ծննդյան տոնավաճառը, որին Հայաստանը մասնակցել է առանձին տաղավարով, հիմնադրամը համակարգել է Հայաստանի մասնակցությունը Ֆրակոֆոնիայի 19-րդ գագաթաժողովին։

Հիմնադրամն աշխատանքներ է տանում նաև  պատմական վայրերի արդիականացման ուղղությամբ, մասնավորապես Գառնու ու Զվարթնոցի տաճարներում մշակութային միջոցառումներ, երաժշտական փառատոներ կազմակերպելով՝ դարձնել սիրելի վայրեր երիատասարդների համար ։ 

«Պատմական տարածքներն ակտիվացնելով՝ նպատակ ունենք ներգրավել և ոգեշնչել երիտասարդ սերունդներին»,- ասաց Ռ.Գրիգորյանը։ 

Մշակույթի զարգացման հիմնադրամն իր գործունեության մեկ տարվա ամփոփիչ արդյունքերը ներկայացրեց Ավ. Իսահակյանի տուն-թանգարանում։ Ի դեպ, վայրը պատահական չէր ընտրված, քանի որ հիմնադրամը մշակել է նաև տուն-թանգարանի վերաբրեդնավորման հայեցակարգը։

Հիմնադրամը նաև շնորհակալագրեր հանձնեց լրագրողներին ու ինֆլուենսերներին` թանգարանային ոլորտը հանրահռչակելու համար։ Panorama.am կայքը նույնպես ստացավ շնորհակալագիր  հիմնադրամի կողմից իրականացված նախագծերը լուսաբանելու, հանրահռչակելու համար։