Սա «խաղաղության համաձայնագիր» չէ. Լեմկինի ինստիտուտը՝ ԱՄՆ-ում Հայաստանի ու Ադրբեջանի միջև նախաստորգրված համաձայնագրի մասին

«Օգոստոսի 8-ին Նիկոլ Փաշինյանը և Ադրբեջանի նախագահ Իլհամ Ալիևը հանդիպեցին Սպիտակ տանը՝ համատեղ հռչակագիր ստորագրելու և ԱՄՆ-ի միջնորդությամբ կնքված «խաղաղության համաձայնագիրը» նախաստորագրելու համար։ Լեմկինի ինստիտուտը զգուշացնում է, որ խաղաղության վաղաժամ տոնակատարությունը վտանգավոր կերպով անտեսում է Ադրբեջանի ցեղասպանական անցյալը և Հայաստանի ինքնիշխանությանը սպառնացող շարունակական սպառնալիքները»,- այս մասին նախազգուշացնում է  Ցեղասպանության կանխարգելման Լեմկինի ինստիտուտը։

Ինստիտուտի հայտարարության մեջ նշվում է. «Համաձայնագրի ներկայիս տեքստը բաց է թողնում տարածաշրջանում երկարատև խաղաղության համար կարևորագույն հիմնական հարցերը՝ 2023 թվականի Արցախյան ցեղասպանության համար արդարադատությունը, 100,000 տեղահանված հայերի իրավունքները, հայ ռազմագերիների և քաղբանտարկյալների ազատ արձակումը, մշակութային ժառանգության ճակատագիրը և պատասխանատվության մեխանիզմները: Փոխարենը, այն ստիպում է Հայաստանին հետ վերցնել իր գործերը Միջազգային դատարանում և Մարդու իրավունքների եվրոպական դատարանում՝ վերացնելով ճշմարտության և արդարադատության միակ օրինական ուղիները»: