ԻՊ-ին աջակցելու համար Աջարիայում ձերբակալվել են Վրաստանի երեք քաղաքացիներ

Վրաստանի պետական ​​անվտանգության ծառայությունը հայտնել է Աջարիայում երեք վրացի քաղաքացիների ձերբակալման մասին, որոնք փորձում էին երկիր մաքսանենգ ճանապարհով բերել «Իսլամական պետություն» ահաբեկչական խմբավորման ազդեցիկ անդամներին։

«Ձերբակալված երեք վրացի քաղաքացիները պլանավորել էին անօրինական ճանապարհով երկիր բերել «Իսլամական պետություն» ահաբեկչական կազմակերպության ազդեցիկ անդամների և նրանց ղեկավարության հետ միասին ստեղծել հավաքի տարածք՝ այդպիսով ապահովելով համախոհ անձանց անօրինական ընդունումը և տեղավորումը, լոգիստիկ ծառայությունների մատուցումը և Վրաստանի տարածքով տարանցումը»,-ասվում է հայտարարության մեջ։

Նշվել է, որ խուզարկության ընթացքում առգրավվել են ահաբեկչական խորհրդանիշներ կրող իրեր, պայթուցիկ նյութեր, մեծ քանակությամբ զինամթերք և հրազեն, փող, բջջային հեռախոսներ և տեղեկատվություն փոխանցելու այլ էլեկտրոնային սարքեր։ Հետաքննություն է ընթանում երկու քրեական հոդվածներով, որոնք պատիժ են նախատեսում հրազենի, զինամթերքի և պայթուցիկ նյութերի անօրինական ձեռքբերման և պահպանման, ինչպես նաև օտարերկրյա ահաբեկչական կազմակերպությանը միանալու և ահաբեկչական գործունեությանը օժանդակելու համար։