«Հրապարակ». Դատական համակարգում այլևս չեն թաքցնում, որ դարձել են Նիկոլ Փաշինյանի «զոհերը»

«Հրապարակ» թերթը գրում է.

«Դատական համակարգում այլևս չեն թաքցնում, որ դարձել են Նիկոլ Փաշինյանի «զոհերը» և շինծու մեղադրանքներով վերևից իջած հրահանգներ են կատարում: Նման իրավիճակ է ստեղծվել, օրինակ, «Մեր ձևով» շարժման անդամ, փաստաբան Ռուբեն Մխիթարյանի կալանքի քննության ժամանակ: Նրան ձերբակալել էին Վարդան Ղուկասյանի ձերբակալության օրը՝  Գյումրու քաղաքապետարանի հրապարակից, 37 քաղաքացու հետ միասին, որից 19-ի համար կալանավորման միջնորդություն էր ներկայացվել դատարան` զանգվածային անկարգություններին մասնակցելու, ոստիկաններին դիմադրելու մեղադրանքներով։

Մխիթարյանի դեմ ոստիկաններից մեկը ցուցմունք է տվել, թե փաստաբանն իբր իր գործողություններին է խոչընդոտել, սակայն նրա պաշտպանները դեպքի վայրից տեսանյութեր են ցուցադրել, որտեղ երևացել է, որ ցուցմունք տվող ոստիկանը շատ հեռու է եղել Մխիթարյանից, և բոլոր դրվագներում Մխիթարյանը եղել է ձեռքերը վեր պարզած, հաշտեցնողի, չհրահրողի դերում։

Եվ երբ դատավորը հեռացել է որոշում կայացնելու, պաշտպանները 100 տոկոսով համոզված են եղել, որ Մխիթարյանին բաց է թողնելու, իսկ ստախոս ոստիկանն ու մեղադրողը դիտողություն են ստանալու, սակայն մեկ ժամ անց դատավոր Վարսենիկ Մելքոնյանը վերադարձել է խոշտանգվածի դեմքով, կարդացել է կալանքի որոշումն ու ամոթահար դեմքով փախել դահլիճից` հասկացնելով, որ ոչինչ իրենից կախված չէր»։

Մանրամասները թերթի այսօրվա համարում։