Ուժային տարբեր կառույցներում հենց այնպես բարձրացրել ենք աշխատավարձը, իսկ սահմանում կանգնած զինվորին ասում ենք՝ գնացեք, քննություններ հանձնեք. Օհանյան

«Հայաստանի սահմանային պաշտպանությունը շուրջ  100 կմ ավելացել է. Ղարաբաղի 283 կմ-ին ավելացվել է Ադրբեջանի  հետ սահմանը՝ Զոդից մինչև Մեղրի»,-  ԱԺ-ում «Զինվորական ծառայության և  զինծառայողի կարգավիճակի մասին» օրենքում փոփոխություն կատարելու մասին օրենքի նախագծի քննարկմանն ասաց «Հայաստան» խմբակցության պատգամավոր, պաշտպանության նախկին նախարար Սեյրան Օհանյանը։

Ըստ նրա, դրանից ելնելով պետք է որոշում ընդունել, թե ինչպիսինն է ազգային անվտանգության ռազմավարությունը և ՊՆ  պետք է վերանայի պաշտպանական  ռազմավարությունը,  դրանից բխող  հարցերով պետք է ինքն իր համալրման ամբողջ գործընթացը կազմակերպի։

«Այսօր  տենում ենք, որ բանակում սահմանային ծառայության մեջ  ընդգրկված են բավականին մեծ  քանակությամբ և զորահավաք,  նաև երկրապահներ, իսկ դրանց ընդգրկումը Զինված ուժեր ազդում է  Զինված ուժերի կարգապահության վրա»,- ասաց Ս.Օհանյանը։

Ինչ վերաբերում է ԶՈւ-ում ատեստացիային, Օհանյանն ասաց,  որ  ուժային տարբեր կառույցներին հենց այնպես հատկացրել են կամ բարձրացրել են աշխատավարձ. «Իսկ բանակում, սահմանում կանգնած զինվորին, ով ամենամեծ դժվարությունն է իր ուսերին կրում, ասում ենք գնացեք, քննություններ հանձնեք, իսկ այդ քննությունները հրամանատարական պատրաստության քննություններ են»:

«Ատեստացիոն համակարգը անհավասար պայմաններ է ստեղծում Զինված ուժերում: Հրամանատարը ստանում է բարձր աշխատավարձ, թող ստանա, բայց պետք է այնպես անել, որ իր զորքն էլ ստանա բարձր աշխատավարձ, ընդ որում որոնք սահմանում են գտնվում»,- ասաց ընդդիմադիր պատգամավորը:

Օհանյանը նշեց, որ դժվար է բանակի մասին քննադատական խոսքեր ասելը, բայց իրողությունից ելնելով պետք է համապատասխան որոշում ընդունել։

«Կուսակցական ծրագրերը մեկ այլ բան են, «Քաղաքացիական պայմանագրի» ծրագրերով մենք ամբողջ Արցախ ենք կորցրել, բայց Զինված ուժերի  զարգացումը, ապահովելը, կազմ-հաստիքային, կառուցվածքների փոփոխությունները, համալրումն այլ բան է պատրաստության հետ կապված»,- ասաց նա։

Մանրամասն՝ տեսանյութում։