Ավելի քան 100 տրակտորներով հույն ֆերմերները շրջափակել են Սալոնիկի նավահանգիստը

Հույն ֆերմերները շրջափակել են Սալոնիկի նավահանգիստը՝ բողոքելով սուբսիդիաների վճարումների կասեցման դեմ: Վարչապետ Կիրիակոս Միցոտակիսը երկուշաբթի օրը շարժման ներկայացուցիչներին հրավիրել է հանդիպման: Euronews-ի փոխանցմամբ՝ հույն ֆերմերները սկսել են Սալոնիկի նավահանգստի խորհրդանշական շրջափակումը: Բողոքի ցույցի մասնակիցները քաղաք են ժամանել ավելի քան 100 տրակտորներով: Նրանցից մի քանիսը կանգնած էին Կունտուրիոտու նավահանգստի փակ դարպասների մոտ:

Բողոքի ցույցի մասնակիցների թվում էին ֆերմերներ, ձկնորսներ և մեղվաբույծներ, ինչպես նաև ուսանողներ և արհմիություններ, որոնք միացել էին նրանց:

Բողոքի ցույցը համակարգվել էր իշխանությունների հետ և խաղաղ էր, սակայն ակտիվիստները շեշտել են, որ եթե իրենց պահանջները չկատարվեն, մոբիլիզացիան կուժեղանա:

Հույն ֆերմերները բողոքի ցույցերն սկսել են նոյեմբերին և այդ ժամանակվանից ի վեր շարունակվում են անդադար: Բողոքի ցույցի մասնակիցները պահանջում են եվրոպական սուբսիդիաների շարունակական վճարումներ: Նախկինում նրանց կանգնեցրել էին կոռուպցիոն սկանդալի պատճառով. քննիչների տվյալներով՝ որոշ ֆերմերներ, ենթադրաբար պետական ​​պաշտոնյաների օգնությամբ, կեղծել են հողի սեփականության փաստաթղթերը՝ օգնություն ստանալու համար: