Քանյե Ուեսթը ֆաշիստական, հակասեմիտական իր հայտարարությունները կապել է դեպրեսիայի հետ

Ամերիկացի ռեփեր Քանյե Ուեսթը, որն այժմ հայտնի է որպես Ye, հայտնել է, որ Շվեյցարիայում վերականգնողական կենտրոն է ընդունվել՝ երկբևեռ խանգարվածության դեմ դեղորայքի փոփոխության հետևանքով առաջացած ծանր դեպրեսիայի պատճառով։

Երկուշաբթի օրը Vanity Fair-ը հայտնել է, որ Ուեսթը Wall Street Journal-ի տպագիր տարբերակում գովազդ է պատվիրել, որպեսզի ներողություն խնդրի վերջին տարիներին իր կողմից հրահրած բոլոր վիճահարույց հարցերի համար։

Ռեփերը բացահայտել է, որ 25 տարի առաջ ավտովթարի է ենթարկվել, որի հետևանքով վնասվել է իր աջ ճակատային բլթը։ Վնասվածքը հանգեցրել է երկբևեռ խանգարման զարգացմանը։ Ուեսթը վերջին տարիներին նացիստական ​​խորհրդանիշների և հակասեմականության նկատմամբ իր մոլուցքը վերագրում է իր մանիակալ շրջաններին, որոնցից մեկը տեղի է ունեցել 2025 թվականի սկզբին, երբ նա չորս ամիս մանիակալ վիճակում է եղել։

Ռեփերը կնոջը՝ Բիանկա Սենսորիին, է վերագրում բժշկական օգնության դիմելու հարցում իր մոտ համոզմունք առաջացնելը։

«Իմ չորսամսյա մանիակալ դրվագի ավարտին անցա այլ դեղորայքի։ Այդ փոփոխությունից հետո հակափսիխոտիկ դեղամիջոցը առաջացրեց շատ խորը դեպրեսիվ դրվագ։ Կինս հասկացավ դա, և մենք Շվեյցարիայի վերականգնողական կենտրոնում գտանք միջոց, որը, ինչպես պարզվեց, արդյունավետ կուրսի կարգավորում է՝ կայունացնող ազդեցությամբ։ Հասկացեք, երկբևեռ [խանգարումը - խմբ.] հիվանդություն է։ Այն ամենամահացու ոչ մահացու հիվանդություններից մեկն է», -ասել է Ուեսթը Vanity Fair-ին տված հարցազրույցում։

Ուեսթը մերժել է այն ենթադրությունները, որ իր հրապարակային ներողությունը առևտրային դրդապատճառներ ուներ։ Նա ընդգծել է, որ կարևոր է, որ նրանք, ովքեր հետևում են իր խոսքերին, հասկանան, թե պատմության որ կողմում է նա ուզում լինել՝ սիրո և պոզիտիվի։