Կրթական նոր հորիզոններ. «Մեր ապագան» հիմնադրամը մեկնարկել է ռուսաց լեզվի ուսուցիչների մասնագիտական զարգացման ծրագիր

Խաչատուր Աբովյանի անվան հայկական պետական մանկավարժական համալսարանի ընթերցասրահն այսօր վերածվել էր մասնագիտական քննարկումների և փորձի փոխանակման կենտրոնի։ Այստեղ մեկտեղվել էին Հանրապետության ավելի քան 45 քաղաքների և բնակավայրերի շուրջ 50 մանկավարժներ՝ մասնակցելու «Ռուսաց լեզուն որպես օտար լեզու գործողության մեջ. տեսությունից մինչև պրակտիկա» խորագրով վերապատրաստման ծրագրին։ Նախագիծը կյանքի է կոչվել «Մեր ապագան» կրթամշակութային բարեգործական հիմնադրամի նախաձեռնությամբ և ՀՊՄՀ-ի աջակցությամբ՝ նպատակ ունենալով զարգացնել ուսուցիչների մասնագիտական կարողությունները։

Սա սոսկ դասախոսությունների շարք չէ, այլ գործնական հարթակ, որտեղ ուսուցիչները ծանոթանում են լեզվի դասավանդման ժամանակակից գործիքներին։ Հատկանշական է, որ ծրագրի առանցքում են ոչ միայն քերականական ու բառապաշարային նորույթները, այլև այնպիսի արդիական թեմաներ, ինչպիսիք են արհեստական ինտելեկտի դերը կրթության մեջ, նախագծային գործունեությունը և ուսանողների հոգեբանական հարմարվողականության մեխանիզմները։ 

Միջոցառման բացմանը «Մեր ապագան» հիմնադրամի գլխավոր տնօրեն Վահրամ Կարապետյանն ընդգծեց, որ իրենց նպատակը հայ մանկավարժին համաշխարհային կրթական տեմպերին համապատասխանեցնելն է։ Նա ներկայացրեց հիմնադրամի գործունեության հիմնական ուղղությունները՝ շեշտելով, որ իրենք ակտիվորեն համագործակցում են Ռուսաստանի առաջատար բուհերի՝ Սանկտ Պետերբուրգի և Մոսկվայի պետական մանկավարժական համալսարանների հետ, ինչը հնարավորություն է տալիս տեղական փորձը հարստացնել միջազգային լավագույն մեթոդներով։

Վահրամ Կարապետյանն իր խոսքում առանձնակի կարևորեց նաև մարզային ընդգրկվածությունը՝ նշելով, որ «Լավագույնը» ազգային մասնագիտական մրցույթն արդեն հաջողությամբ անցկացվել է Շիրակի և Կոտայքի մարզերում և շուտով կտարածվի ողջ հանրապետությունում։ 

ՀՊՄՀ ռուսաց լեզվի և դրա դասավանդման մեթոդիկայի ամբիոնի վարիչ Նաիրա Դալյանն իր հերթին բարձր գնահատեց հիմնադրամի հետ տարիների ձևավորված գործընկերությունը՝ շեշտելով, որ նմանօրինակ անվճար ծրագրերը կենսական նշանակություն ունեն մանկավարժների համար և չեն սահմանափակվում միայն այս նախագծով։ 

Միջոցառմանը ներկա էին նաև ՌԴ դեսպանության ներկայացուցիչ Միխայիլ Վոժդաևը և հրավիրյալ փորձագետներ Մոսկվայից ու Սանկտ Պետերբուրգից, ինչը շեշտում է նախաձեռնության միջպետական և գիտական բարձր մակարդակը։ Բացի կրթական ուղղությունից, հիմնադրամը ակտիվ է նաև մշակութային դաշտում՝ կազմակերպելով համերգներ ու ստեղծագործական երեկոներ երկրի տարբեր ռեգիոններում։

Մանրամասները՝ տեսանյութում։