Դեղատներում գները բարձրանում են. Բժշկական ապրանքների գնաճը 4 անգամ գերազանցում է շուկայի միջին ցուցանիշը

Հայաստանի ոչ պարենային ապրանքների շուկայում 2026 թվականի հունվարին արձանագրվել են գնային ուշագրավ տատանումներ, որոնք արտացոլում են թե՛ համաշխարհային շուկաների ազդեցությունը, թե՛ տեղական սպառողական դինամիկան: Պաշտոնական վիճակագրական տվյալների համաձայն՝ ընթացիկ տարվա հունվարին նախորդ տարվա նույն ժամանակահատվածի համեմատ ոչ պարենային ապրանքների գներն աճել են 0.9%-ով, սակայն 2025 թվականի դեկտեմբերի համեմատությամբ շուկայում գրանցվել է 0.1% գնանկում: 

Այս չնչին նվազումը միատարր չէ հանրապետության ողջ տարածքում. դիտարկվող բնակավայրերից հինգում գները նվազել են 0.1-0.4%-ով, մինչդեռ վեց այլ բնակավայրերում արձանագրվել է 0.1-0.3% գնաճ: Մայրաքաղաք Երևանում ոչ պարենային ապրանքների գները հետևել են նվազման միտմանը՝ կազմելով 0.1%: Գնային փոփոխությունների կառուցվածքում առանձնակի հետաքրքրություն են ներկայացնում վառելիքի շուկայի ցուցանիշները: 

Հատկանշական է բենզինի և դիզելային վառելիքի շարունակական գնանկումը. միայն վերջին մեկ ամսվա ընթացքում բենզինը էժանացել է 4.5%-ով, իսկ դիզելային վառելիքը՝ 1.6%-ով: Եթե դիտարկենք տարեկան կտրվածքով, ապա 2025 թվականի հունվարի համեմատ բենզինի գինը նվազել է 5.7%-ով, իսկ դիզելային վառելիքինը՝ 3.3%-ով: Սրան հակառակ, կտրուկ թանկացում է նկատվել հեղուկ ածխաջրածինների (բութան, պրոպան և այլն) շուկայում: 

2026թ. հունվարին հեղուկ գազի միջին ամսական գինը կազմել է 223.8 դրամ, ինչը նախորդ ամսվա համեմատ նշանակում է 19.0% աճ, իսկ նախորդ տարվա հունվարի համեմատ՝ 9.2% գնաճ: Առանձին ապրանքախմբերի մանրամասն վերլուծությունը ցույց է տալիս, որ տարեկան կտրվածքով գնային ամենամեծ թռիչքը գրանցվել է ոսկերչական զարդերի շուկայում, որտեղ գներն աճել են ռեկորդային՝ 42.7%-ով: Սա կարող է պայմանավորված լինել թանկարժեք մետաղների միջազգային բորսայական գների աճով: 

Գնաճային ճնշումը չի շրջանցել նաև դեղատները. բժշկական սարքավորումների շուկայում գներն աճել են 4.1%-ով, իսկ դեղագործական ապրանքների պարագայում սպառողները ստիպված են 3.5%-ով ավելի վճարել, քան նախորդ տարի։ Կենցաղային տեխնիկայի և սարքավորումների պարագայում պատկերը հակասական է. եթե փոքր էլեկտրական սարքերի գները բարձրացել են 1.8%-ով, իսկ կարճատև օգտագործման կենցաղային ապրանքներինը՝ 1.6%-ով, ապա խոշոր կենցաղային սարքերը էժանացել են 0.9%-ով, իսկ կահույքն ու կահավորանքը՝ 0.2%-ով: 

Թեթև արդյունաբերության ոլորտում փոփոխությունները չնչին են եղել. հագուստի գներն աճել են 0.4%-ով, իսկ տարբեր տեսակի կոշիկներինը՝ ընդամենը 0.1%-ով: Բնակարանների նորոգման և սպասարկման նյութերի շուկայում գրանցվել է 0.5% գնաճ, իսկ անձնական գործածության այլ ապրանքների դեպքում՝ 1.1% աճ: Միակ ոլորտը, որտեղ արձանագրվել է շոշափելի գնանկում, սիրողական այգեգործությունն է, որի ապրանքները նախորդ տարվա հունվարի նկատմամբ էժանացել են 5.4%-ով: Ընդհանուր առմամբ, ոչ պարենային շուկան 2026-ի սկզբին դրսևորում է կայունության միտումներ, բացառությամբ թանկարժեք զարդերի և էներգակիրների որոշ տեսակների: