Սա ոչ միայն սոցիալական անարդարություն է, այլ ուղիղ սպառնալիք բուժօգնության որակին. Անուշ Պողոսյանի ահազանգը

Հայաստանում գործող առողջապահական ապահովագրության համակարգում բուժաշխատողի վարձատրությունը չի համապատասխանում աշխատանքի բարդությանը, մասնագիտական ու իրավական պատասխանատվությանը և բժշկական ռիսկի մակարդակին։ Այս մասին ահազանգում է «Առողջության իրավունք» ՀԿ նախագահ Անուշ Պողոսյանը։

Նա մանրամասնում է.

«Այսօր բժիշկը ստիպված է աշխատել՝

ավելացված ծանրաբեռնվածությամբ,

մեծ հաշվետվական բեռի տակ,

մշտական ստուգումների ու տուգանքների ռիսկով,

բայց առանց համարժեք վարձատրության և սոցիալական երաշխիքների։

Սա ոչ միայն սոցիալական անարդարություն է, այլ ուղիղ սպառնալիք բուժօգնության որակին։

Ցածր վարձատրությունը խրախուսում է բուժաշխատողների արտահոսքը, մասնագիտական այրումը և երբեմն նաև կոռուպցիոն վարքագծի ռիսկերը։

Այս համակարգում պարտվողը մեկն է՝ Հայաստանի Հանրապետության քաղաքացին։

Պարտվում է հիվանդը։

Պարտվում է բժիշկը։

Պարտվում է պետությունը՝ իր իսկ քաղաքական որոշումների հետևանքով։

Այս քաղաքականությունը անհապաղ վերանայվելու անհրաժեշտություն ունի, քանի որ այն արդեն վնաս է հասցնում ոչ թե ապագայում, այլ այստեղ և հիմա՝ մարդու առողջությանը, բժշկի արժանապատվությանը և պետության վստահությանը»։