Սննդաբանը բացատրել է, թե ինչպես ճիշտ խմել առավոտյան առաջին բաժակ սուրճը

Շատերն իրենց առավոտը սկսում են մի բաժակ անուշաբույր սուրճով, բայց ոչ բոլորն են դրանից օգուտ քաղում: Դիետոլոգ և սննդաբան Սոֆիա Կովանովան aif.ru-ին տված հարցազրույցում բացատրել է, թե ինչպես ճիշտ օգտագործել ըմպելիքը՝ ստամոքսի խնդիրներից խուսափելու և ամբողջ օրվա ընթացքում էներգիան պահպանելու համար:

Մասնագետի խոսքով, դատարկ ստամոքսին սուրճ խմելը թույլատրելի է, բայց միայն մեկ պայմանով՝ եթե անձը որևէ ստամոքս-աղիքային խնդիր չունի: Գաստրիտով, ռեֆլյուքսով կամ բարձր թթվայնությամբ տառապողները պետք է խուսափեն այս սովորությունից:

«Եթե կա նման խնդիր, թթվային տարբերակները չեն աշխատի: Սա վերաբերում է ոչ միայն կոֆեինին, այլև, օրինակ, կիտրոնով ջրին: Ֆիզիոլոգիապես ավելի լավ է օրգանիզմի համար սուրճ խմել նախաճաշից հետո, կամ գոնե դրա հետ միասին», - բացատրել է Կովանովան:

Սննդաբանը նաև հիշեցրել է մարդկանց չափավորության մասին։ Օպտիմալ քանակը օրական ոչ ավելի, քան 300-400 մլ է։ Այս չափաքանակի գերազանցումը չի բարձրացնում կոնցենտրացիան, բայց կարող է ունենալ հակառակ ազդեցություն՝ անհանգստություն և նյարդայնություն։

Ավելին, կարևոր է հաշվի առնել վերջին բաժակի խմելու ժամանակը։ Կովանովան խորհուրդ է տալիս սուրճ խմել քնելուց առնվազն վեց ժամ առաջ, հակառակ դեպքում երեկոյան կարող եք խնդիրներ ունենալ քնելու հետ։