Արշակ Սրբազանի գործով դատավորն ինքնաբացարկ հայտնեց՝ բավարարելով փաստաբանների միջնորդությունը

Արմավիրի մարզի ընդհանուր իրավասության դատարանի դատավոր Գևորգ Մանուկյանը բավարարեց Արշակ արքեպիսկոպոս Խաչատրյանի պաշտպանների միջնորդությունը և ինքնաբացարկ հայտնեց։ 

Այսօր մեկնարկել է  Արշակ Սրբազանի գործով  նիստը։ Հենց սկզբում սրբազանի պաշտպանները  նիստը նախագահող դատավոր Գևորգ Մանուկյանին ինքնաբացարկ հայտնելու միջնորդություն ներկայացրեցին։ Դատավորը բավարարեց միջնորդությունը։ 

«Քրեական վարույթը կհանձնվի դատարանի աշխատակազմ՝ վերամակագրման համար»,- հայտարարեց դատավորը։ 

Սրբազանի պաշտպան Երեմ Սարգսյանը հայտարարել է, որ նախագահող դատավորի անձնական կաշկանդվածության կամ կանխակալության  մասին կոնկրետ խոսել չեն կարող, բայց այն փաստը, որ դատավորն աշխատել է քննչական մարզային վարչությունում, կոնկրետ քննիչների հետ, ակամայից  գործընկերային հարաբերություններ է ունեցել, դատախազությունում է աշխատելու ու ներկայիս մեղադրող Ալիսա  Բոյաջյանի հետ գործընկերային հարաբերություններ ունեցել, ինքնին իրենց  առերևույթ թույլ է տալիս կարծելու, որ հնարավոր է լինի հետագայում որևէ կանխակալություն։ Ըստ փաստաբանի, Եվրոպական դատարանի մոտեցումը կայանում է  նրանում, որ եթե կան օբյեկտիվ փաստեր, որոնք կարող են կասկածի տեղիք տալ, ապա դատարանը չպետք է այդ գործը քննի։