Վրաստանի ԱԳՆ. Բրյուսելի հայտարարություններն ու գործողությունները խրախուսում են երկրում արմատականությունը

Բրյուսելի վերջին հայտարարություններն ու քայլերը խաթարում են Վրաստան-ԵՄ հարաբերությունները և խրախուսում երկրում արմատականությունը։ Այս մասին հայտնել է Վրաստանի արտաքին գործերի նախարարության մամուլի ծառայությունը՝ ԵՄ դեսպան Պավել Գերչինսկու նախարարություն կատարած այցից հետո, որը տեղի է ունեցել այն բանից հետո, երբ նա հայտարարել էր, որ երկիրը «մութ ժամանակներ» է ապրում։

«Վրաստանի նկատմամբ Բրյուսելի ներկայիս քաղաքականությունը, նրա քայլերն ու հայտարարությունները խաթարում են կողմերի միջև վստահությունը և վնասում են Վրաստանի և ԵՄ-ի միջև գործընկերությանը։ Ցավոք, Բրյուսելի գործողությունները կարող են գնահատվել միայն որպես վրացական հասարակության հետագա բևեռացման և արմատական ​​օրակարգի խրախուսմանն ուղղված քայլեր», -ՏԱՍՍ-ի փոխանցմամբ, ասվում է հայտարարության մեջ։

Վրաստանի արտաքին գործերի նախարարությունը հավելել է, որ Վրաստանի փոխվարչապետ և արտաքին գործերի նախարար Մակա Բոչորիշվիլին, որը հանդիպում է ունեցել եվրոպացի դիվանագետի հետ, նշել է, որ Վրաստանի իշխանությունները միշտ պատրաստակամություն են հայտնել կառուցողական երկխոսության մեջ մտնելու և արդար և հարգալից վերաբերմունք են ակնկալում ԵՄ-ից։

Մինչ այդ Գերչինսկին լրագրողներին ասել էր, որ Եվրամիությունը չպետք է թույլ տա, որ վրաց ժողովուրդը «վերադառնա բռնության, քաղաքացիական պատերազմի, աղքատության, կոռուպցիայի և մութ ժամանակների»։ Հանրապետության իշխանությունները դեսպանի խոսքերը ընկալել են որպես սպառնալիք իրենց բնակչության համար։