Իրանի նախագահը Հռոմի Պապին ուղղված նամակում ասել է, երբ Հորմուզի նեղուցում կվերսկսի բնականոն տարանցումը

Իրանի նախագահ Մահսուդ Փեզեշքիանը Հռոմի պապ Լևոն XIV-ին ուղղված նամակում կոչ է արել աշխարհի բոլոր երկրներին դիմակայել Վաշինգտոնի անօրինական պահանջներին։

Իրանական ԶԼՄ-ների փոխանցմամբ, Փեզեշքիանը նամակում  նշել է, որ 2026թ. Փետրվարի 28-ին սկսված ԱՄՆ-Իսրայելական ագրեսիայի արդյունքում սպանվել է Իրանի հոգևոր առաջնորդ այաթոլլահ Խամենեին, բարձրաստիճան քաղաքական և ռազմական գործիչներ, ինչպես նաև սպանվել են 3468 քաղաքացիական անձինք։ Ագրեսիայի հետևանքով մեծ վնաս են հասցվել դպրոցներին, համալսարաններին, հիվանդանոցներին, կրոնական վայրերին ու ենթակառուցվածքներին՝ գործողություններ, որոնք նա որակել է որպես հստակ պատերազմական հանցագործություններ։

Նամակում մեջբերելով ինչպես Ղուրանի, այնպես էլ Աստվածաշնչի հատվածներ, որոնք դատապարտում են ամբարտավանությունը՝ նա գովաբանել է Հռոմի պապի «բարոյական, տրամաբանական և արդար դիրքորոշումները» հարձակման վերաբերյալ, որը տեղի է ունեցել կեղծ պատրվակների վրա հիմնված շարունակական բանակցությունների ընթացքում: Նա ասել է, որ ԱՄՆ նախագահի կողմից «Իրանի պատմական քաղաքակրթությունը ոչնչացնելու» հայտարարված մտադրությունը բացահայտում է բացարձակ իշխանության պատրանք:

Փեզեշքիանը շեշտել է, որ Իրանի բազմազան կրոնական համայնքները դարեր շարունակ խաղաղ համակեցության մեջ են եղել, և որ Իրանը երբեք չի սպառնացել իր հարևաններին: Այնուամենայնիվ, Պարսից ծոցի ափամերձ պետություններում ԱՄՆ բազաների օգտագործումը հարձակումների համար ստիպել է իրանական ուժերին հարվածել ագրեսորի շահերին այնտեղ՝ օրինական ինքնապաշտպանության նպատակով:

Հորմուզի նեղուցի վերաբերյալ նա նշել է, որ ներկայիս իրավիճակը ուղղակիորեն բխում է ԱՄՆ-ի անօրինական հարձակումներից և ծովային շրջափակումից: Բնականոն տարանցումը կվերսկսվի, երբ ներկա վտանգավոր դրությունը վերացվի, և Իրանը կկիրառի միջազգային իրավունքի կարգավորող մեխանիզմներ։

Փեզեշքիանը վերահաստատել է Իրանի հանձնառությունը դիվանագիտությանը և Պակիստանի միջնորդությամբ բանակցություններին:

«Իրանի դիրքորոշումը ԱՄՆ կառավարության անօրինական պահանջների դեմ միջազգային իրավունքի և բարձր մարդկային արժեքների պաշտպանության դիրքորոշում է», - գրել է նա՝ կոչ անելով իրատեսական և արդար միջազգային արձագանքի։

Փեզեշքիանը եզրափակել է նամակը՝ վերահաստատելով Իրանի հանձնառությունը երկխոսությանը և վեճերի խաղաղ, օրինական լուծմանը։

Հիշեցնենք, որ Իրան-ԱՄՆ-Իսրայելական վերջին հակամարտությունը սկսվել էր 2026-ի փետրվարից և դեռևս լիարժեք խաղաղության փուլ չի մտել։ Կոնֆլիկտը նոր փուլ էր մտել Իրանի միջուկային զենք ստեղծելու շուրջ, երբ ԱՄՆ-ը և Իսրայելը հարձակում սկսեցին Իրանի դեմ, հարվածներ հասցնելով Իրանի ռազմական և միջուկային օբյեկտներին։ Լայնածավալ հարձակումների արդյունքում Իրանում զոհերի թիվը տարբեր աղբյուրների համաձայն հասնում 5000-7000 մարդ, որոնց մի մասը քաղաքացիական անձինք, Իսրայելում իրանական հարվածներից զոհվել է առնվազն 28 և վիրավորվել՝ ավելի քան 4200 մարդ։  Լիբանանում իսրայելական հարվածներից զոհերի թիվը անցել է 2000-ը։ Իսկ Պակիստանում հակամարտության հետ կապված բողոքների և անկարգությունների ընթացքում զոհվել է մոտ 26–35 մարդ։

ԱՄՆ-ն և նրա դաշնակիցները Իրանից պահանջում են դադարեցնել ուրանի հարստացման գործընթացը, սահմանափակել բալիստիկ հրթիռների ծրագիրը և միջազգային վերահսկողության տակ դնել միջուկային օբյեկտները։ Վաշինգտոնը նաև պնդում էր, որ Թեհրանը պետք է նվազեցնի իր ռազմական ներգրավվածությունը տարածաշրջանում և ապահովի Հորմուզի նեղուցով ազատ նավարկությունը։ Իրանը, իր հերթին, պահանջում էր անհապաղ դադարեցնել ռազմական գործողությունները, վերացնել տնտեսական պատժամիջոցները և ապաշրջափակել արտասահմանում սառեցված իրանական ակտիվները։ Թեհրանը նաև հայտարարում էր, որ չի հրաժարվի խաղաղ նպատակներով միջուկային ծրագրից և պահանջում էր անվտանգության միջազգային երաշխիքներ։