ԱՄՆ-ն նոր հարվածներ է հասցրել Իրանին՝ թիրախավորելով հրթիռային կայանները. BBC

ԱՄՆ-ն հայտարարել է, որ նոր հարվածներ է հասցրել Իրանի հարավին՝ թիրախավորելով իրանական հրթիռային կայանները և ականներ տեղադրելու փորձ կատարող նավակները։ Այս մասին գրում է BBC-ին։

Հարվածները ձեռնարկվել են «ինքնապաշտպանության» նպատակով և նախատեսված են եղել «մեր զորքերը իրանական ուժերի կողմից ներկայացվող սպառնալիքներից պաշտպանելու համար», - ասվում է ԱՄՆ կենտրոնական հրամանատարության հայտարարության մեջ։

Կենտրոնական հրամանատարության խոսնակ կապիտան Թիմ Հոքինսը հայտարարել է, որ ԱՄՆ զինված ուժերը «շարունակում են պաշտպանել իրենց ուժերը՝ միաժամանակ զսպվածություն ցուցաբերելով երկու երկրների միջև շարունակվող հրադադարի ընթացքում»։

Իրանը դեռևս չի արձագանքել ԱՄՆ-ի հարձակմանը։ Այնուամենայնիվ, Իրանի արտաքին գործերի նախարարության խոսնակ Իսմայիլ Բաղային ավելի վաղ հայտարարել էր, որ չնայած պատերազմը դադարեցնելու բանակցություններում որոշակի առաջընթաց է գրանցվել, համաձայնագիրը «անխուսափելի չէ»։

Հարվածներից հետո ԱՄՆ պետքարտուղար Մարկո Ռուբիոն հայտարարել է, որ համաձայնագիրը դեռևս հնարավոր է և մատնանշել է երեքշաբթի օրը Իրանի արտաքին գործերի նախարարի և Քաթարի վարչապետի միջև կայանալիք բանակցությունները։

«Տեսնենք՝ կկարողանանք առաջընթաց գրանցել։ Կարծում եմ՝ շատ են խոսում նախնական փաստաթղթում առկա կոնկրետ ձևակերպումների մասին, ուստի դա մի քանի օր կտևի», - Հնդկաստան կատարած պաշտոնական այցի ժամանակ լրագրողներին ասել է  Ռուբիոն։

Երկուշաբթի օրվա հարվածների մասին Ռուբիոն ասել է. «Նեղուցները պետք է բաց լինեն։ Դրանք այս կամ այն ​​կերպ կբացվեն, այնտեղ տեղի ունեցողը անօրինական է, անկայուն է աշխարհի համար և անընդունելի է»։

«Նյու Յորք Թայմսի» տվյալներով՝ կապիտան Հոքինսն ասել է, որ ԱՄՆ հարվածները թիրախավորել են Բանդար Աբբասի մոտակայքում գտնվող տարածքը, որը հարավային նավահանգստային քաղաք է և որտեղ գտնվում է  իրանական ռազմածովային բազաները։

Իրանական պետական ​​լրատվամիջոցներն ավելի վաղ հայտնել էին, որ Բանդար Աբբասի տեղական պաշտոնյաները հետաքննություն են սկսել պայթյունների ձայներից հետո։ Մայիսի սկզբին Հորմուզի նեղուցում իրանական և ամերիկյան ռազմածովային ականակիրների միջև տեղի ունեցած բախումը, որի համար կողմերից յուրաքանչյուրը մեղադրում էր մյուսին, Թրամփին ստիպեց պնդել, որ հրադադարը դեռևս ուժի մեջ է։
Ըստ տեղեկությունների՝ քննարկվող փոխըմբռնման հուշագիրը ներառում է հրադադարի 60-օրյա երկարաձգում, Հորմուզի նեղուցի վերաբացում և Իրանի միջուկային ծրագրի շուրջ հետագա բանակցությունների ծրագիր։

ԱՄՆ-ի և Իրանի ուժերը հրադադար են պահպանում ապրիլի 8-ից։ Իրանը պահպանում է Հորմուզի նեղուցով Պարսից ծոցի նավագնացության վերահսկողությունը, իսկ ԱՄՆ ռազմածովային ուժերը փորձում են շրջափակել Իրանի նավահանգիստները։

Հիշեցնենք, որ ԱՄՆ-ն և Իսրայելը փետրվարի 28-ին լայնածավալ հարվածներ հասցրին Իրանին, ինչը հակամարտություն առաջացրեց Մերձավոր Արևելքում։ Իրանը ի պատասխան հարձակվել է Իսրայելի և Պարսից ծոցում ԱՄՆ-ի դաշնակից պետությունների վրա և փաստացի, փակելով Հորմուզի նեղուցը, հանգեցրել է նավթի գների համաշխարհային աճի։