Այվազովսկու «Իններորդ ալիքը» առաջին անգամ կվերականգնվի

Հանրահայտ ծովանկարիչ Հովհաննես Այվազովսկու «Իններորդ ալիք» նկարը առաջին անգամ կուղարկվի վերականգնման։ Այս մասին հաղորդում է «Ինտերֆաքսը»՝ հղում անելով Ռուսական թանգարանի մամուլի ծառայությանը:

«Աշխատանքի Ռուսական թանգարանում գտնվելու ողջ ընթացքում մասնագետները միայն տեղայնացված պահպանման միջոցառումներ են իրականացրել՝ ներկի շերտի ամրացում, աննշան երանգավորում և պրոոֆելակտիկ աշխատանքներ: Վերականգնողների կողմից երկարատև դիտարկումները ցույց են տվել, որ նախաներկի և ներկի շերտի վիճակը աստիճանաբար վատթարանում է. մեծանում են ճեղքերը, հայտնվում են նոր ճաքեր և ներկի տեղայնացված շերտազատում», - ասվում է հայտարարության մեջ:

Նկարի լիարժեք, համապարփակ գիտական ​​վերականգնում իրականացնելու որոշումը կայացվել է Այվազովսկու խոշոր ցուցահանդեսի բացման նախօրեին՝ 2026 թվականի հոկտեմբերին։ Նկարը Միխայլովսկի պալատի ակադեմիական № 14 դահլիճից կտեղափոխվի Բենուա թևի բաց վերականգնման դահլիճ, որտեղ այցելուները կկարողանան դիտել վերականգնողների աշխատանքը։

Վերականգնման ավարտից հետո դիտողները կկարողանան տեսնել նկարը այնպիսի գունային գամմայով, որը հնարավորինս մոտ կլինի հեղինակի սկզբնական մտադրությանը։

1850 թվականին ստեղծված այս նկարը կենտրոնական տեղ է զբաղեցնում Ռուսական թանգարանի մշտական ​​ցուցադրությունում։ Այն հավաքածու է մտել 1897 թվականին՝ իր պատմական ոսկեզօծ շրջանակի հետ միասին, որի գիտական ​​վերականգնումը կիրականացվի կտավի վրա աշխատանքի հետ միաժամանակ։