Մարսողական համակարգի հիվանդություններն աշխարհում ամենատարածվածներից են

Մայիսի 29-ը` մարսողական համակարգի առողջության համաշխարհային օրն է։ Մարսողական համակարգի առողջության համաշխարհային օրը (World Digestive Health Day-WDHD) կարևորագույն առողջապահական նախաձեռնություն է, որն ամեն տարի հիշեցնում է մեզ մեր օրգանիզմի «երկրորդ ուղեղի»՝ աղեստամոքսային տրակտի կարևորության մասին։ Օրն առաջին անգամ նշվել է 2004 թվականին՝ կազմակերպության հիմնադրման 45-ամյակի պատվին։

«Հերացի» վերլուծական կենտրոնից նշում են, որ մարսողական համակարգի հիվանդությունները (գաստրիտ, խոցեր, աղիքային խնդիրներ, լյարդի հիվանդություններ) աշխարհում ամենատարածվածներից են։

Այս օրվա հիմնական նպատակներն են․

Բարձրացնել հանրության իրազեկվածությունը մարսողական խնդիրների և դրանց կանխարգելման մասին։

Խրախուսել առողջ ապրելակերպն ու ճիշտ սննդակարգը։

Աջակցել հիվանդությունների վաղ հայտնաբերմանը և բուժմանը։

Յուրաքանչյուր տարի կազմակերպությունն ընտրում է առանձնահատուկ թեմա (օրինակ՝ «Աղիքային միկրոբիոմ», «Ճարպակալում և լյարդի առողջություն» կամ «Ողնաշարի ու մարսողության կապը») և ողջ տարվա ընթացքում ուշադրություն կենտրոնացնում հենց այդ խնդրի վրա։ Այս տարվա արշավի համար ընտրվել է «Քրոնիկ դիարեա. մի՛ անտեսեք ախտանիշները» կարգախոսը` նպատակն ունենալով հաղթահարել խարանը, բարձրացնել իրազեկությունը և խրախուսել այս թերագնահատված վիճակի բժշկական գնահատումը:

Մարսողական համակարգը պատասխանատու է սննդի մշակման, սննդանյութերի կլանման և թափոնների հեռացման համար։ Այն բաղկացած է մի շարք օրգաններից, այդ թվում՝ բերանից, կերակրափողից, ստամոքսից, աղիքներից և լյարդից։ Մարսողական համակարգի առողջությունը կարևոր է ընդհանուր առողջության պահպանման համար, քանի որ այն ապահովում է օրգանիզմի բոլոր բջիջների սնուցումը։

Մարսողական առողջության բարելավման համար կարևոր է հետևել առողջ ապրելակերպին։

Հավասարակշռված սնունդ. սննդի մեջ ընդգրկեք մրգեր, բանջարեղեն, ամբողջական հացահատիկներ և սպիտակուցներ։

Հիդրատացիա. օրվա ընթացքում բավարար քանակությամբ ջուր խմեք։

Ֆիզիկական ակտիվություն. պարբերաբար զբաղվեք սպորտով կամ ֆիզիկական ակտիվությամբ։

Սթրեսի կառավարում. նվազեցրեք սթրեսը: Մեր աղիներն ու ուղեղը սերտորեն կապված են (stress-gut connection)։ Սթրեսը հաճախ դառնում է ստամոքսի ցավերի և փորկապության պատճառ, սթրեսի մակարդակը նվազեցնելու համար կիրառեք մեդիտացիա կամ յոգա։

Մարսողական համակարգի հիվանդությունները կարող են լինել ինչպես ժառանգական, այնպես էլ արտաքին գործոնների հետևանք։ Դրանք ներառում են գաստրիտը, խոցերը, մարսողական խանգարումները և այլ խնդիրներ։ Կանխարգելման համար կարևոր է հետևել բժշկի խորհրդատվություններին և անցնել պարբերական բժշկական ստուգումներ։

Օրվա շրջանակներում մասնագետները հիշեցնում են, որ չի կարելի անտեսել քրոնիկ ախտանիշները, ինչպիսիք են՝

Այրոցի մշտական զգացողությունը,

Որովայնի անբացատրելի, երկարատև ցավերը,

Քաշի կտրուկ կորուստը,

Մարսողության տևական խանգարումները։