Ավստրալիայում առգրավել են ավելի քան 100,000 արգելված խավարասեր

Ավստրալիայի իշխանությունները հայտարարել են երկրի պատմության մեջ էկզոտիկ անողնաշարավորների ամենախոշոր առգրավման մասին։ Նոր Հարավային Ուելս նահանգի Բատերստ քաղաքում գործող առևտրային բուծողից հայտնաբերվել և առգրավվել է ավելի քան 100,000 խավարասեր։ Այս մասին հայտնում է Associated Press-ը։

Ըստ Ավստրալիայի Կլիմայի փոփոխության, էներգետիկայի, շրջակա միջավայրի և ջրային ռեսուրսների նախարարության՝ առգրավված միջատների ընդհանուր արժեքը գնահատվում է շուրջ 200 հազար ավստրալական դոլար (մոտ 142 հազար ԱՄՆ դոլար)։ Գործողությունն իրականացվել է մայիսին։

Առգրավված խավարասերների մեծ մասը պատկանում էր Մադագասկարյան սուլող խավարասերի և դուբիա խավարասերի տեսակներին, որոնց պահպանումն ու տարածումը երկրում  արգելված է։ Մադագասկարյան սուլող խավարասերը համարվում է աշխարհի ամենամեծ խավարասերներից մեկը․ դրա երկարությունը հասնում է 5-8 սմ-ի։ Գերատեսչության հրապարակած լուսանկարներում երևում են խոշոր, փայլուն շագանակագույն միջատներ, որոնք չափերով գերազանցում են մարդու մատի լայնությունը։

Համեմատության համար՝ Ավստրալիայում տարածված սովորական խավարասերների երկարությունը սովորաբար կազմում է 2.3-3.6 սանտիմետր։ Չնայած երկրում խավարասերների հարյուրավոր տեսակներ են հանդիպում և դրանք բարենպաստ պայմաններ են գտնում Ավստրալիայի մերձարևադարձային կլիմայում, օտարերկրյա տեսակների ներմուծումն ու բուծումը խստորեն վերահսկվում է՝ տեղական էկոհամակարգերը պաշտպանելու նպատակով։

Պաշտոնյաների գնահատմամբ՝ այս առգրավումը կարևոր քայլ է կենսաբանական անվտանգության պահպանման և հնարավոր էկոլոգիական վտանգների կանխման գործում։