Գերմանիան և ֆրանսիան քննարկում են Կայա Կալլասին դիվանագիտական ծառայության ղեկավարի լիազորություններից զրկելու հնարավորությունը

Եվրոպական միության առաջատար երկրները՝ Ֆրանսիան և Գերմանիան, քննարկում են ԵՄ արտաքին քաղաքականության կառույցի խոշոր վերակազմակերպման հնարավորությունը՝ նպատակ ունենալով բարձրացնել դաշինքի արդյունավետությունը աշխարհաքաղաքական ճգնաժամերին արձագանքելու գործում։ Այս մասին հայտնում է The Times of Israyel-ը ՝ հղում անելով Financial Times-ին։

Պարբերականի տեղեկություններով՝ Փարիզը, Բեռլինը և մի շարք այլ եվրոպական մայրաքաղաքներ դիտարկում են տարբեր առաջարկներ, որոնց շրջանակում կարող են սահմանափակվել ԵՄ գլխավոր դիվանագետ Կայա Կալլասի լիազորությունները։ Քննարկվող տարբերակներից մեկը նախատեսում է ներկայումս գործող Եվրոպական արտաքին գործողությունների ծառայության որոշ գործառույթների փոխանցում Եվրոպական հանձնաժողովին և անդամ պետություններին։

Արտաքին գործողությունների ծառայությունը, որը ստեղծվել է մոտ 15 տարի առաջ՝ ԵՄ արտաքին քաղաքականությունը համակարգելու նպատակով, տարեկան տնօրինում է շուրջ 1 միլիարդ եվրո բյուջե։ Սակայն վերջին տարիներին մի շարք անդամ երկրներ դժգոհություն են հայտնել կառույցի արդյունավետությունից՝ հատկապես միջազգային ճգնաժամերի, անվտանգության մարտահրավերների և արագ փոփոխվող աշխարհաքաղաքական միջավայրի պայմաններում։

Վերակազմակերպման քննարկումները դեռևս նախնական փուլում են, և վերջնական որոշումներ չեն ընդունվել։ Այնուամենայնիվ, նախաձեռնությունը վկայում է ԵՄ ներսում աճող մտահոգությունների մասին, որ ներկայիս դիվանագիտական մեխանիզմները միշտ չէ, որ բավարար արագությամբ և ազդեցությամբ են արձագանքում միջազգային զարգացումներին։

Վերլուծաբանների կարծիքով, եթե առաջարկները կյանքի կոչվեն, դրանք կարող են էականորեն փոխել ԵՄ արտաքին քաղաքականության կառավարման համակարգը և ուժերի բալանսը Բրյուսելի ինստիտուտների ու անդամ պետությունների միջև։ Ակնկալվում է, որ առաջիկա ամիսներին թեման կդառնա եվրոպական քաղաքական շրջանակների ակտիվ քննարկման առարկա, հատկապես այն պայմաններում, երբ ԵՄ-ն բախվում է միաժամանակ մի քանի արտաքին և անվտանգության մարտահրավերների։