ԱՄՆ-ում ինքնաթիռի վթարի հետևանքով զոհվել են օդաչուն և 11 պարաշյուտիստներ

ԱՄՆ Միսսուրի նահանգում ինքնաթիռի վթարի հետևանքով զոհվել են տասնմեկ պարաշյուտիստներ և մեկ օդաչու։ Այս մասին հայտնում է BBC-ն։ Բեյթս շրջանի արտակարգ իրավիճակների կառավարման ծառայության խոսնակի ներկայացմամբ, ինքնաթիռը, որը վարձակալվել էր պարաշյուտային սպորտի ընկերության կողմից, կիրակի օրը տեղական ժամանակով մոտավորապես 11:20-ին թռիչք է կատարել։

Դեռ բարձրություն չհավաքած՝ այն կտրուկ ձախ շրջադարձ է կատարել և վթարի ենթարկվել Բատլեր Մեմորիալ օդանավակայանից մոտ 200 յարդ հեռավորության վրա, ինչի հետևանքով ինքնաթիռում գտնվող բոլոր 12 անձինք մահացել են։

ԱՄՆ Դաշնային ավիացիոն վարչությունը (FAA) հայտարարել է, որ ինքնաթիռը վթարի է ենթարկվել օդանավակայանից մեկնելիս։

«Այդ պահին օդային երթևեկության սպասարկում չէր իրականացվում», - ասել է FAA-ն:

 Մամուլի խոսնակը բացատրել է, որ ինքնաթիռը պարտավոր չէր կապի մեջ լինել՝ պայմանավորված այն օդային տարածքով, որով թռչում էր:

Տեղական լրատվամիջոցները հայտնել են, որ առաջին արձագանքողները ստուգել են տարածքը՝ պարզելու համար, թե արդյոք պարաշյուտիստներից որևէ մեկը ցատկե՞լ է ինքնաթիռից վթարից առաջ։

Ղեկավարի խոսքով՝ մահացածների ընտանիքների որոշ անդամներ ականատես են եղել միջադեպին։ Իշխանությունները զոհերի ինքնության վերաբերյալ դեռևս տեղեկություններ չեն տրամադրել։

Բատլեր քաղաքը գտնվում է Կանզաս Սիթիի մետրոպոլիտենային տարածքից մոտ 50 մղոն հարավ։ FAA-ն հայտնել է, որ վթարի հետաքննությունը ղեկավարում է Ազգային տրանսպորտային անվտանգության խորհուրդը (NTSB):