Վիետնամում 500 կատու են գողացել, որ ուտեն

Վիետնամում իշխանությունները բացահայտել են կատվազգիների ենթադրյալ գողություն կազմակերպող ցանց, որի հետևանքով փրկվել է ավելի քան 400 կատու, որոնք նախատեսված էին մորթի համար։ Այս մասին հայնում է BBC-ն՝ հղում անելով  կենդանիների պաշտպանության խմբին։

Հոշիմին քաղաքի ոստիկանության պաշտոնական թերթի համաձայն, ինը մարդ է ձերբակալվել կատուների գողության համար։ Անցյալ շաբաթ Թեյ Նին նահանգում և Հոշիմին քաղաքում կատարված խուզարկությունների ժամանակ ոստիկանները հայտնաբերել են ավելի քան 400 ողջ կատու և մոտ 80 սատկած ։ Եվս 21 կատու առգրավվել է մեկ այլ վայրում:

Շան և կատվի մսի օգտագործումը Վիետնամում օրինական է, սակայն վաճառողները պետք է թույլտվություններ ստանան, որոնք ցույց կտան կենդանիների ծագումը։

Տեղական լրատվամիջոցների հաղորդագրությունների համաձայն, ոստիկանությունը հայտնել է, որ խմբին հայտնաբերել են հունիսի 11-ին՝ Հոշիմին քաղաքում կենդանիների գողությունների մի շարք դեպքերի հետաքննությունից հետո:

Ոստիկանությունը հայտնել է՝ կասկածյալները խոստովանել են, որ վերջին երեք տարիների ընթացքում կատուներ են որսացել և հավաքել Վիետնամի հարավում: Հետաքննիչների տվյալներով՝ կասկածյալները, ենթադրաբար, գողացված կատուներին տեղափոխել են «կալանքի վայրեր», նախքան դրանք առևտրականներին վաճառելը, ընդ որում՝ գործարքները տեղի են ունեցել յուրաքանչյուր երկու-երեք օրը մեկ:

«Humane World for Animals»  կազմակերպությունը երեքշաբթի օրը հայտնել է, որ գողացված կատուներից մոտ 40-ը վերադարձվել են իրենց տերերին։ Կազմակերպությունը գովել է տեղական իշխանություններին «վճռական գործողությունների համար, որոնք փրկել են այդքան շատ կենդանիների կյանք», սակայն նշել է, որ կենդանիներից մի քանիսը հետագայում սատկել են անցած փորձությունների հետևանքով։ Կազմակերպությունից նշել են, որ ոստիկանությունը որպես ապացույց դեռ պահում է կենդանիներին։

Ոստիկանությունը հայտնել է, որ հետաքննությունը շարունակվում է և կոչ է արել այն բնակիչներին, ովքեր կարծում են, որ իրենց ընտանի կենդանիները գողացվել են, դիմեն իրավապահներին։

Ըստ «Humane World for Animals» կազմակերպության՝ Վիետնամում ամեն տարի  գողացվում, ապօրինի առևտրով զբաղվող և մսի համար մորթվում է մոտ հինգ միլիոն շուն և մեկ միլիոն կատու։

Կազմակերպությունը նշում է, որ ընտանի կենդանիները հաճախ գողանում են տներից, շներին հաճախ առևանգում են թունավոր խայծ պարունակող էլեկտրաշոկային սարքերով և երկաթե աքցաններով, իսկ կատուներին՝ զսպանակավոր թակարդներով։

Թեև շան և կատվի մսի սպառումը Վիետնամում շարունակում է ավելի տարածված մնալ, քան մյուս ասիական երկրներում, ակտիվիստները նշում են, որ վերաբերմունքն աստիճանաբար փոխվում է:

«Humane World for Animals»-ի պատվերով 2023 թվականին անցկացված հարցումը ցույց է տվել հասարակության աճող դիմադրություն մասնավորապես երիտասարդների և ընտանի կենդանիների տերերի շրջանում, ընդ որում՝ մեծամասնությունը կողմ է շների և կատուների մսի առևտրի արգելքին։