Մելոնին Թրամփին մեղադրել է իր մասին «լիովին հորինված» պատմություն տարածելու մեջ

Իտալիայի վարչապետ Ջորջիա Մելոնին մեղադրել է ԱՄՆ նախագահ Դոնալդ Թրամփին իր մասին «լիովին հորինված» պատմություն տարածելու մեջ՝ այն բանից հետո, երբ վերջինս իտալական La7 հեռուստաալիքին ասել էր, թե Մելոնին «աղաչել է» իրեն լուսանկարվել G7 գագաթնաժողովի ընթացքում։ Այս մասին հայտնում է Reuters-ը։ 

Մելոնին հայտարարել է, որ «զարմացած» է Թրամփի մեկնաբանություններից՝ դրանք որակելով որպես «լիովին հորինված»։ Նա նաև քննադատել է ԱՄՆ նախագահին՝ նշելով, որ վերջինս Արևմուտքի հակառակորդների նկատմամբ ավելի մեծ հարգանք է ցուցաբերում, քան երկարամյա դաշնակիցների։

Նրանց միջև լարվածությունը սրվել է ընդամենը մի քանի օր անց այն բանից հետո, երբ G7 գագաթնաժողովում նկատվել էին հարաբերությունների բարելավման նշաններ։ Իտալիայի արտաքին գործերի նախարար Անտոնիո Տայանին, ընդգծելով ստեղծված իրավիճակի լրջությունը, չեղարկել է հաջորդ շաբաթ նախատեսված այցը ԱՄՆ, ինչպես նաև Մայամիում կայանալիք ԱՄՆ-Իտալիա գործարար համաժողովը։

Ֆրանսիայում տեղի ունեցած միջոցառումից տեսանյութում երևում էր, թե ինչպես են Մելոնին և Թրամփը խոր զրույցի մեջ նստած կողք կողքի։ Սակայն Թրամփը La7-ին տված հարցազրույցում հայտարարել է. «Նա հավանաբար ուրախ է, որ ես նրա հետ խոսեցի։ Ես պարտավոր չէի նրա հետ խոսել»։

Նա նաև հավելել է. «Նա աղաչեց ինձ լուսանկարվել իր հետ։ Նա շատ էր ուզում լուսանկարվել ինձ հետ։ Ես չէի նկարվի, բայց ես կարեկցում էի նրան»։

Մելոնիի մերձավոր քաղաքական դաշնակից, վարչապետի գրասենյակի փոխնախարար Ջովանբատիստա Ֆացոլարին նույնպես խիստ քննադատել է Թրամփին։

Մելոնին, որը նախկինում համարվում էր Թրամփի ակտիվ աջակիցներից մեկը և 2025 թվականին մասնակցել էր նրա երդմնակալությանը, վերջին ամիսներին ավելի հաճախ է քննադատում ԱՄՆ նախագահին։ Այս տարվա ընթացքում նա դատապարտել է Թրամփի քննադատությունը Հռոմի պապի հասցեին, ինչին ի պատասխան Թրամփը մեղադրել էր Իտալիայի վարչապետին քաջության պակասի մեջ։