Իսրայելն ու «Հեզբոլլшհը» հայտարարում են հրադադարի մասին, սակայն բախումները շարունակվում են

Իսրայելի և «Հեզբոլլահի» միջև հրադադարի շուրջ համաձայնություն է ձեռք բերվել, հայտնել է ամերիկացի պաշտոնյան՝ հարավային Լիբանանում Իսրայելի կողմից իրականացված ինտենսիվ օդային հարվածներից հետո: Դրանց հետևանքով զոհվել է առնվազն 47 մարդ։ Այս մասին հայտնում է BBC-ն։

Սակայն հրադադարի ուժի մեջ մտնելուց հետո էլ կողմերը շարունակում են միմյանց մեղադրել պայմանավորվածությունները խախտելու մեջ։

Համաձայնության հասնելու հիմնական պատճառներից մեկը մտավախությունն էր, որ շարունակվող ռազմական գործողությունները կարող են վտանգել ԱՄՆ-ի և Իրանի միջև ձեռք բերված պատերազմը դադարեցնելու պայմանավորվածությունը։ Իսրայելական բանակը հաստատել է հրադադարի ուժի մեջ մտնելը, սակայն ավելի ուշ հայտարարել է, որ կշարունակի «վերացնել անմիջական սպառնալիքները»։

Մինչ այժմ «Հեզբոլլահը» պաշտոնապես չի հաստատել հրադադարը։ Խմբավորման գլխավոր քարտուղար շեյխ Նաիմ Քասեմը հայտարարել է, որ «Հեզբոլլահը վերացնելու նախագիծը ձախողվել է», և իսրայելական ուժերը ստիպված կլինեն հեռանալ Լիբանանի տարածքից։

Լիբանանի Նաբաթիե քաղաքի փրկարարական ծառայությունների տվյալներով՝ հրադադարի մեկնարկից հետո գրանցվել է առնվազն 12 օդային հարված։ Լիբանանի առողջապահության նախարարությունը հայտնել է, որ վերջին իսրայելական հարվածների հետևանքով զոհվել է 47 մարդ, այդ թվում՝ կանայք և երեխաներ, իսկ 97 մարդ ստացել է տարբեր աստիճանի վնասվածքներ։

Միևնույն ժամանակ, «Հեզբոլլահը» հայտարարել է, որ հարավային Լիբանանում դարանակալել է իսրայելական ստորաբաժանման, ոչնչացրել երեք տանկ և հրթիռային ու հրետանային կրակով հարվածել զորքերին։ Բախումների ընթացքում զոհվել է չորս իսրայելցի զինվոր, որոնց թվում՝ նաև գումարտակի հրամանատար։

Վաշինգտոնը շարունակում է պնդել, որ հրադադարի համաձայնությունը պահպանվում է, սակայն իրավիճակը տեղում շարունակում է լարված մնալ։ Իրանը մեղադրում է ԱՄՆ-ին Իսրայելին զսպելու հարցում ձախողվելու համար, իսկ Իրանի արտգործնախարար Աբբաս Արաղչին հայտարարել է, որ համաձայնության ցանկացած խախտման պատասխանատվությունը կկրի նաև Վաշինգտոնը։

Լարվածությունը խորացնում են նաև քաղաքական հայտարարությունները։ Իսրայելի ազգային անվտանգության նախարար Իթամար Բեն Գվիրը, արձագանքելով իսրայելցի զինվորների մահվանը, կոչ է արել ավելի կոշտ գործողություններ ձեռնարկել Լիբանանի դեմ։ Իր հերթին ԱՄՆ նախագահ Դոնալդ Թրամփը քննադատել է Իսրայելի վարչապետ Բենիամին Նեթանյահուին՝ ենթադրելով, որ «Հեզբոլլահի» դեմ պայքարի ընթացքում անիմաստ կերպով զոհվում են խաղաղ բնակիչներ։

ԱՄՆ Պետդեպարտամենտը հայտնել է, որ հաջորդ շաբաթ Վաշինգտոնում կվերսկսվեն Լիբանանի կառավարության և Իսրայելի միջև ուղիղ բանակցությունները՝ երկարաժամկետ խաղաղության հասնելու նպատակով։ Սակայն Լիբանանի նախագահ Ջոզեֆ Աունը հայտարարել է, որ առաջընթացի համար անհրաժեշտ է լիարժեք հրադադար և իսրայելական հարձակումների ամբողջական դադարեցում։

Վերջին հակամարտության սկզբից ի վեր, ըստ Լիբանանի առողջապահության նախարարության, զոհվել է ավելի քան 3900 մարդ, վիրավորվել՝ ավելի քան 11 600-ը։ Մոտ մեկ միլիոն մարդ շարունակում է մնալ տեղահանված, իսկ երկրի հարավում տասնյակ բնակավայրեր ամբողջությամբ ավերվել են։