Էլ Նինյոյի պատճառով ամբողջ աշխարհում շաքարի գները կտրուկ կաճեն

Էլ Նինյո եղանակային երևույթը կարող է ոչնչացնել Հնդկաստանում շաքարեղեգի բերքը, որի դեպքում երկիրը ստիպված կլինի սահմանափակել իր արտահանումը, ինչի արդյունքում շաքարավազի համաշխարհային գները կտրուկ կբարձրանան։ Ռիա նովոստիին նման կարծիք է հայտնել պարենային անվտանգության փորձագետ Անատոլի Տիխոնովը։

«Հարավարևմտյան մուսսոնը, որը Հնդկաստանում հայտնի է որպես «իսկական ֆինանսների նախարար», այս տարի տհաճ անակնկալ է պատրաստում համաշխարհային շուկաների համար։ Հնդկաստանում շաքարի արտադրությունը կարող է տարեկան նվազել 3-8 միլիոն տոննայով։ Եթե Հնդկաստանը ամբողջությամբ չեղարկի իր արտահանման ծրագիրը, և Բրազիլիան չկարողանա արագորեն ավելացնել մատակարարումները սահմանափակ վերամշակման պատճառով, համաշխարհային գները զգալիորեն կբարձրանան», - բացատրել է փորձագետը։

Շաքարեղեգը Հնդկաստանի երկրորդ կարևորագույն ապրանքն է բրնձից հետո։ Երկիրը Բրազիլիայի հետ միասին առաջատարն է շաքարի արտադրության և արտահանման ոլորտում։ Այնուամենայնիվ, շաքարի արտադրության հիմնական շրջաններն արդեն զգում են Էլ Նինյոյի հետևանքները և ջրի պակաս կա։ 

Էլ Նինյոյի մասին լուրերին արձագանքելով՝ Լոնդոնի ֆոնդային բորսայում սպիտակ շաքարի ֆյուչերսները հունիսի սկզբին գերազանցել են մեկ տոննայի համար 660 դոլարը։

Մինչդեռ Հնդկաստանն արդեն հայտարարել է շաքարի արտահանման դադարեցման մասին մինչև սեպտեմբերի 30-ը։ Եթե երկիրը որոշի ամբողջությամբ դադարեցնել շաքարի մատակարարումները, փորձագետը կանխատեսում է, որ համաշխարհային գները կբարձրանան մինչև 750-800 դոլար մեկ տոննայի համար։