Իրանը խստացրել է վերահսկողությունը Հորմուզի նեղուցում

Իրանը խստացնում է վերահսկողությունը Հորմուզի նեղուցում, աճում են ծովային անվտանգության մտահոգությունները։ Այս մասին հայտնում է Reuters-ը։ Շաբաթ օրը նեղուցում գտնվող նավերի վրա իրականացված հարձակումը հաջորդեց հինգշաբթի օրը բեռնատար նավի վրա տեղի ունեցած մեկ այլ հարձակմանը՝ խորացնելով լարվածությունը։

Ըստ հաղորդագրությունների՝ Իրանը նոր քայլեր է ձեռնարկում աշխարհի կարևորագույն էներգետիկ նավագնացության երթուղու նկատմամբ վերահսկողությունն ուժեղացնելու ուղղությամբ։ Այդ երթուղին վերջին երկու շաբաթների ընթացքում աստիճանաբար վերաբացվում էր ամիսներ շարունակված խափանումներից հետո։ Մեծ Բրիտանիայի UKMTO ծովային անվտանգության գործակալությունը հայտնել է, որ շաբաթ օրը հարվածի հետևանքով կամուրջը վնասվել է։

Միաժամանակ, նավագնացության անվտանգությունն ապահովող միջազգային նավատորմերի կոալիցիայի ղեկավարած Համատեղ ծովային տեղեկատվական կենտրոնը հայտարարել է, որ վերջին միջադեպերից հետո բարձրացրել է ծովային անվտանգության սպառնալիքի մակարդակը։ Իրանը պաշտոնապես չի մեկնաբանել նավերի վրա արձանագրված կոնկրետ հարձակումների վերաբերյալ հաղորդագրությունները։

Սակայն Իրանի պետական հեռուստատեսությունը տեղեկացրել է, որ Իսլամական հեղափոխության պահապանների կորպուսը «զգուշացնող կրակոցներ» է արձակել այն նավերի ուղղությամբ, որոնք, ըստ իրանական կողմի, փորձել են անցնել չհաստատված երթուղով։

Հեռուստատեսության փոխանցմամբ՝ այդ գործողություններից հետո այլ նավեր ստիպված են իրանական թույլտվություն խնդրել՝ նախքան նեղուցը հատելու փորձ կատարելը։ Ավելի վաղ Իրանի արտաքին գործերի նախարարությունը հայտարարել էր, որ պաշտպանական հարվածներ է հասցրել ԱՄՆ-ի հետ առնչվող ռազմական թիրախներին։ Միևնույն ժամանակ, Բահրեյնը, որտեղ տեղակայված է ԱՄՆ ռազմածովային ուժերի տարածաշրջանային շտաբը, հայտնել էր իրանական անօդաչու թռչող սարքի հարձակման մասին։ ԱՄՆ զինված ուժերը այդ հաղորդագրություններին անմիջապես չէին արձագանքել։ Իրանը նաև մեղադրել է Միացյալ Նահանգներին ժամանակավոր համաձայնագրի պայմանները չկատարելու մեջ՝ նշելով, որ չի ապահովվել Լիբանանում խոստացված հրադադարի իրականացումը։

 Իրանի գնահատմամբ՝ այդ պարտավորությունը խախտվել է այն բանից հետո, երբ ԱՄՆ դաշնակից Իսրայելը մարտին ռազմական գործողություններ սկսեց Լիբանանում՝ հետապնդելով Իրանի աջակցությունը վայելող «Հեզբոլլահ» խմբավորմանը։ Չնայած Իսրայելի և Լիբանանի միջև ԱՄՆ-ի միջնորդությամբ բազմիցս ձեռք բերված հրադադարի համաձայնություններին, այդ թվում՝ վերջինը, որի մասին հայտարարվել է ուրբաթ օրը, իրավիճակը շարունակում է մնալ անկայուն։ Իսրայելը պնդում է, որ չի պատրաստվում դուրս բերել իր զորքերը գրավված տարածքներից, մինչդեռ «Հեզբոլլահը» հրաժարվում է զենքը հանձնել այնքան ժամանակ, քանի դեռ իսրայելական ուժերը շարունակում են մնալ այդ տարածքներում։ Այս հանգամանքները շարունակում են խոչընդոտել տարածաշրջանում երկարաժամկետ կայունության հաստատմանը։