Դամասկոսում տեղի ունեցած պայթյունի հետևանքով զոհերի ու վիրավորների թիվն ավելացել է

Դամասկոսի կենտրոնում գտնվող սրճարանում երեկ տեղի ունեցած ռումբի պայթյունի հետևանքով զոհվել է 9 և վիրավորվել 20 մարդ. Այս մասին հայտնում է Reuters-ը՝  վկայակոչելով Սիրիայի ներքին գործերի նախարարության տվյալները։ Դեռևս ոչ ոք պատասխանատվություն չի ստանձնել։

Պայթուցիկ սարքը  տեղադրվել է մայրաքաղաքի կենտրոնում գտնվող Արդարադատության պալատի մոտ գտնվող սրճարանում:

Ներքին գործերի նախարարությունը հայտարարել է՝  նախնական հետաքննությունը ցույց է տվել, որ պայթել է մոտ մեկ կիլոգրամ քաշով և մետաղական բեկորներով լցված պայթուցիկ սարքը, որը պատճառել է ծանր վնասվածքներ և մեծ վնասներ։

Այս հարձակումը ևս մեկ անվտանգության մարտահրավեր է ներկայացնում նախագահ Ահմեդ ալ-Շարաայի Սիրիայի կառավարության համար, որը իշխանությունը ստանձնեց 2024 թվականի վերջին նախկին նախագահ Բաշար ալ-Ասադին տապալելուց հետո։ Ասադի տապալումը փաստացի վերջ դրեց ավելի քան 14 տարի տևած քաղաքացիական պատերազմին։

Այդ ժամանակվանից ի վեր Դամասկոսում տեղի են ունեցել մի շարք նման դեպքեր, այդ թվում՝ մայիսին պաշտպանության նախարարության շենքի մոտ մեքենայի պայթյունը, որը խլեց մեկ սիրիացի զինվորի կյանք, վնասվածքներ ստացան 18 մարդ։

Չնայած պայթյունի համար ոչ մի խմբավորում պատասխանատվություն չի ստանձնել, «Իսլամական պետությունը» փորձել է օգտվել Ասադի տապալման հետևանքով ստեղծված անվտանգության վակուումից՝ հավաքագրելով զինյալներ և տեղափոխելով զենք, քանի որ նոր կառավարությունը տարածում է իր իշխանությունը ամբողջ երկրում։

Խմբավորումը հիմա  շատ ավելի թույլ է, քան այն ժամանակ, երբ այն վերահսկում էր Սիրիայի և Իրաքի մեծ մասը՝ մինչև 2019 թվականին ինքնահռչակված խալիֆայության փլուզումը։