ԵՄ-ն պատրաստվում է տուգանել Meta-ին սոցցանցերից կախվածություն առաջացնելու համար, սակայն ընկերությունը չի ընդունում մեղադրանքները

Եվրամիությունը խստացնում է վերահսկողությունը Meta-ի նկատմամբ՝ մեղադրելով Instagram-ի և Facebook-ի աշխատանքային մեխանիզմները օգտատերերի, հատկապես անչափահասների շրջանում «կախվածություն» ձևավորելու մեջ՝ հայտնում են միջազգային լրատվամիջոցները։

Եվրոպական հանձնաժողովի նախնական եզրակացության համաձայն՝ ընկերությունը խախտում է Թվային ծառայությունների մասին օրենքը (DSA), քանի որ բավարար չափով չի գնահատել հարթակների ազդեցությունը մարդկանց ֆիզիկական և հոգեկան առողջության վրա։ Բրյուսելը պահանջում է սահմանափակել հարթակը, տեսանյութերի ավտոմատ նվագարկումը և չափազանց անհատականացված առաջարկությունները՝ դրանք համարելով պարտադիր օգտագործումը խթանող գործոններ։

Եթե Meta-ն չկատարի պահանջները, այն կարող է տուգանվել իր տարեկան համաշխարհային շրջանառության մինչև 6 տոկոսի չափով։ Ընկերությունը, սակայն, չի ընդունում մեղադրանքները՝ պնդելով, որ արդեն ներդրել է դեռահասների պաշտպանության մի շարք միջոցներ։

Միաժամանակ Եվրոպայում ակտիվ քննարկվում է   նաև սոցիալական ցանցերի օգտագործման տարիքային սահմանափակումների հարցը։

Ավստրալիան, Ինդոնեզիան և Մալայզիան արդեն սահմանափակումներ են կիրառել, իսկ Ֆրանսիան, Դանիան, Հունաստանը և մի շարք այլ եվրոպական երկրներ պատրաստվում են նման քայլերի։ Եվրոպական հանձնաժողովի նախագահ Ուրսուլա ֆոն դեր Լեյենը նախատեսում է սեպտեմբերին ներկայացնել փորձագիտական զեկույցի հիման վրա առաջարկներ, սակայն դեռ պարզ չէ՝ ԵՄ-ն կսահմանի միասնական տարիքային շեմ, թե այդ իրավունքը կթողնի անդամ պետություններին։ Թեև որոշ փորձագետներ աջակցում են երեխաների առավել արդյունավետ պաշտպանությանը, նրանք զգուշացնում են, որ սոցիալական մեդիայի ամբողջական արգելքները կարող են չարդարացնել սպասումները և առաջարկում են ավելի հավասարակշռված լուծումներ, որոնք միաժամանակ կպաշտպանեն նաև երեխաների իրավունքները։