Չինաստանում ուժեղ ջրհեղեղից հետո 900 հսկայական օձեր են «փախել» ֆերմայից

Չինաստանում օձերը, այդ թվում՝ թունավոր կոբրաները, «փախել» են բուծման ֆերմայից՝ «Մայսակ» թայֆունի պատճառած ուժեղ ջրհեղեղի ժամանակ։ Այս մասին հայտնում է discoverwildlife.com-ը։ 

«Մայսակ» թայֆունը Չինաստանի համար տարվա առաջին թայֆունն է և մինչ օրս բազմաթիվ զոհերի պատճառ է դարձել, 130,000 մարդ տարհանվել է։

The Independent-ը գրում է, որ Գուանսի Չժուան ինքնավար շրջանը օրեր շարունակ զգում է թայֆունի հետևանքները: Երկուշաբթի կեսգիշերին իշխանությունները հայտարարել էին տարածաշրջանում ջրհեղեղի ամենաբարձր մակարդակի մասին, իսկ երեքշաբթի կեսօրին երկրի 62 գետերի մակարդակը բարձրացել էր ջրհեղեղի մասին նախազգուշացման մակարդակից։ 

Հենչժոուի Դենվեյ գյուղում գտնվող օձերի ֆերման, ըստ տեղեկությունների, անցել է ջրի տակ, երբ մոտակա ջրամբարները ճեղքել են դրանց պատերը։

«Մեր նախնական գնահատականներով՝ մոտ 800-900 օձ է փախել, երբ ֆերման անցել է ջրի տակ։ Մինչ այժմ մեկ գյուղացու խայթել է օձը,  և նա տեղափոխվել է հիվանդանոց», - պետական ​​«Red Star News»-ին ասել է Հենչժոուի Յունբյաո ավանի Դենգվեյ գյուղական կոմիտեի ղեկավար Վու Չժին։

Տեղական ֆերմաներում հիմնականում բուծվում են երեք տեսակի օձեր՝ կոբրաներ, թագավորական առնետային օձեր և ջրային օձեր (միայն կոբրաներն են թունավոր): Դրանք բուծվում են ավանդական բժշկության, մսի և հակաթույնի համար: