ԱԹՍ-ների հարվածներից հետո Wildberries-ի հիմնադիրը հայտարարությամբ է հանդես եկել

Wildberries-ի հիմնադիր Տատյանա Կիմը հայտարարել է, որ ընկերությունը մշակում է այն վաճառողների փոխհատուցումների և ֆինանսական աջակցության մեխանիզմները, որոնց ապրանքները պահվել են Էլեկտրոստալի և Կոտովսկի լոգիստիկական կենտրոններում։

Նրա խոսքով, չնայած ստեղծված արտակարգ իրավիճակին և կորցրած ապրանքների համար փոխհատուցում տրամադրելու իրավական պարտավորության բացակայությանը, ընկերությունն արդեն գնահատում է վաճառողներին կատարվելիք վճարումների ծավալները և ֆինանսական աջակցության լրացուցիչ միջոցառումները։

Վաճառողների համար նախատեսվող փոխհատուցումների, աջակցության միջոցների և դրանց ստացման կարգի վերաբերյալ մանրամասն տեղեկատվությունը կհրապարակվի վաճառողների պորտալում։

Բացի այդ, Տատյանա Կիմը հայտնել է, որ Wildberries-ը ֆինանսական աջակցություն կտրամադրի նաև լոգիստիկական կենտրոնների վրա հարձակումների հետևանքով զոհվածների ընտանիքներին և տուժածներին։ Զոհվածների ընտանիքները կստանան 2 միլիոն ռուբլի, իսկ ծանր վիճակում գտնվող տուժածները՝ 1 միլիոն ռուբլի։

Շաբաթ երեկոյան Մոսկվայի մարզի մի քանի թաղամասեր ենթարկվել են անշարժ թևերով անօդաչու թռչող սարքերի հարձակմանը։ Առավոտյան Wildberries-Russ-ը հայտնել է, որ Կոտովսկում և Էլեկտրոստալում գտնվող իր լոգիստիկ օբյեկտները ենթարկվել են հարձակման։

Կոտովսկում Wildberries-ի պահեստի վրա անօդաչու թռչող սարքերի հարվածների հետևանքով զոհվել է յոթ մարդ, ևս 25-ը վիրավորվել են։ Մոսկվայի մարզում լոգիստիկ կենտրոնի վրա հարձակման հետևանքով տուժել է 30 մարդ։