Թրամփը 50% մաքսատուրք է սահմանել Կանադայից ներմուծվող մի շարք ապրանքների վրա

ԱՄՆ նախագահ Դոնալդ Թրամփը 50% մաքսատուրք է սահմանել Կանադայից ներմուծվող ապրանքների վրա՝ պատճառաբանելով, որ Կանադան անհավասար վերաբերմունք է ցուցաբերում ամերիկյան մեքենաների, կաթնամթերքի և ալկոհոլի նկատմամբ։ Այս մասին հայտնում է BBC-ն։

Նոր մաքսատուրքերը կվերաբերեն ինչպես առօրյա սպառողական ապրանքներին, այդ թվում՝ գինիներին և հոկեյի փայտիկներին, այնպես էլ արդյունաբերական արտադրանքի, օրինակ՝ ցեմենտի ներմուծմանը։

Սպիտակ տան հայտարարության համաձայն՝ մաքսատուրքերը ուժի մեջ կմտնեն 30 օրից։

Կանադայի վարչապետ Մարկ Քարնին հայտարարել է, որ երկիրը պատրաստ է ակտիվացնել առևտրային բանակցությունները ԱՄՆ-ի հետ առաջիկա շաբաթներին։ Նա քննադատել է Վաշինգտոնի որոշումը՝ այն անվանելով ԱՄՆ-ի միակողմանի առևտրային քայլերի շարունակություն, որը խախտում է Կանադա-ԱՄՆ-Մեքսիկա համաձայնագիրը՝ USMCA-ն։

Նոր մաքսատուրքերը կկիրառվեն նաև այն ապրանքների նկատմամբ, որոնք ներառված էին ազատ առևտրի համաձայնագրի շրջանակներում։ ԱՄՆ-ն արդեն գործում է կանադական պողպատի, ալյումինի և պղնձի ներմուծման նկատմամբ սահմանված մաքսատուրքերով, իսկ Կանադան իր հերթին սահմանել է հակադարձ մաքսատուրքեր ամերիկյան որոշ ապրանքների նկատմամբ։

Թրամփի վարչակազմը նշում է, որ հիմնական խնդիրներից մեկը ավտոմոբիլային ոլորտն է։ Նախագահը պնդում է, որ Կանադան անհավասար հարկային պայմաններ է ստեղծում ամերիկյան մեքենաների և ավտոպահեստամասերի համար։ Սակայն Հյուսիսային Ամերիկայի ավտոմոբիլային արտադրությունը սերտորեն կապված է երեք երկրների՝ ԱՄՆ-ի, Կանադայի և Մեքսիկայի միջև։

Մյուս վիճահարույց ոլորտը կաթնամթերքն է։ ԱՄՆ-ը երկար ժամանակ քննադատել է Կանադայի մատակարարման կառավարման համակարգը, որը սահմանափակում է արտասահմանյան ներմուծումը և որոշ դեպքերում նախատեսում բարձր մաքսատուրքեր։

Կանադայի և ԱՄՆ-ի միջև լարվածության ևս մեկ պատճառ է դարձել ամերիկյան ալկոհոլային խմիչքների նկատմամբ Կանադայի որոշ նահանգներում գործող բոյկոտը։ Կանադացի պաշտոնյաները հայտարարել են, որ այն կարող է դադարեցվել, եթե ԱՄՆ-ը վերացնի կանադական հիմնական ոլորտների նկատմամբ կիրառվող մաքսատուրքերը։

Առևտրային բանակցողները փորձում են հասնել համաձայնության, որը կնվազեցնի գործող սահմանափակումների մի մասը։ Միաժամանակ, ԱՄՆ-ը հայտարարել է, որ ցանկանում է փոփոխություններ կատարել USMCA համաձայնագրում, որը կնքվել էր Թրամփի առաջին նախագահության ընթացքում։