ՖԻՖԱ-ն հետաքննում է Արգենտինայի հավաքականի վարքագիծը ԱԱ եզրափակչից հետո

ՖԻՖԱ-ի կարգապահական կոմիտեն էթիկայի դատախազ է նշանակել՝ գնահատելու Աշխարհի առաջնության եզրափակչից հետո Նյու Ջերսիի «ՄետԼայֆ» մարզադաշտում տեղի ունեցած միջադեպերը։ Հայտնում է BBC-ն։

Եզրափակիչ սուլիչից հետո, երբ Իսպանիան 1-0 հաշվով հաղթեց Արգենտինային և սկսեց տոնել չեմպիոնությունը, երկու հավաքականների խաղացողների ու մարզչական խմբերի միջև բախումներ տեղի ունեցան։

Միջադեպերին, ըստ հաղորդումների, ներգրավված են եղել Նահուել Մոլինան, Լեանդրո Պարեդեսը, Տիագո Ալմադան և Արգենտինայի հավաքականի մարզչի օգնական Ռոբերտո Այալան։ Սկզբում ՖԻՖԱ-ն հայտնել էր, որ Պարեդեսը կարմիր քարտ է ստացել Էրիկ Գարսիայի նկատմամբ ագրեսիվ գործողության համար, սակայն հետագայում այդ տեղեկությունը հետ է վերցվել՝ նշելով, որ խաղի ընթացքում նրա նկատմամբ կարգապահական միջոց չի կիրառվել։ Արգենտինայի կազմում, սակայն, Էնցո Ֆերնանդեսը հեռացվել էր երկրորդ դեղին քարտի պատճառով։

ՖԻՖԱ-ն այժմ կքննի ոչ միայն հնարավոր բռնի վարքագիծը, այլև արդար խաղի սկզբունքների և բարեկիրթ վարքագծի խախտումները։ Եթե խաղացողները կամ Արգենտինայի ֆուտբոլի ասոցիացիան մեղավոր ճանաչվեն, հնարավոր են որակազրկումներ և ֆինանսական տույժեր։ Կարգապահական և էթիկայի դատախազը գործը գնահատելիս հաշվի կառնի ինչպես ծանրացնող, այնպես էլ մեղմացնող հանգամանքները և անհրաժեշտության դեպքում կարող է կիրառել համաշխարհային մասշտաբով գործող պատժամիջոցներ։

Սա Արգենտինայի նկատմամբ ընթացող միակ կարգապահական գործընթացը չէ։ ՖԻՖԱ-ն արդեն ուսումնասիրում է նաև Անգլիայի հավաքականի  դեմ կիսաեզրափակչից հետո արգենտինացի ֆուտբոլիստների ցուցադրած «Las Malvinas son Argentinas» («Ֆոլկլենդյան կղզիները արգենտինական են») գրությամբ պաստառի հարցը, որը կարող է հանգեցնել լրացուցիչ տուգանքի կամ առանձին խաղացողների պատժի։

Արգենտինայի հավաքականի վարքագիծը նախկինում ևս կարգապահական խնդիրների պատճառ է դարձել։ 2022 թվականի աշխարհի առաջնության եզրափակչից հետո թիմը տուգանվել էր ոչ սպորտային վարքի համար, իսկ դարպասապահ Էմիլիանո Մարտինեսը հետագայում երկու խաղով որակազրկվել էր վիրավորական վարքագծի պատճառով։ Վերջին տարիներին ՖԻՖԱ-ն նման գործերով արդեն կիրառել է խիստ պատժամիջոցներ՝ Լուիս Ռուբիալեսի երեք տարվա և Լուիս Սուարեսի չորս ամսվա որակազրկումների օրինակներով։

ՖԻՖԱ-ն դեռ չի սահմանել հետաքննության ավարտի ժամկետը, ուստի հայտնի չէ, թե երբ կհրապարակվեն վերջնական եզրակացություններն ու հնարավոր պատժամիջոցները։